264 Have we gained anything by replacing Sonia-manmo raj with modi-jaitley-rajna raj??

264 మనము సోనియా-మన్మో రాజ్ స్థానంలో మోడీ-జైట్లీ-రాజ్నా రాజ్ ను స్థాపించుకొని లాభ పడ్డామా?
చర్చనీయాంశాలు: 264, మన్మోహన్, సోనియా, నరేంద్రమోడీ, అరుణ్ జైట్లీ, రాజ్ నాథ్ సింగ్, ధరలు, గ్యాస్, సారానాథ్, బౌధ్ధం

మన్మోహన్ ముఖోటాగా ఏలబడిన, సోనియా రాజ్యం పోయిందని మనం సంబరపడటం ఎంత మేరకు సబబు? వీపు మీదనుండి రెండు బండరాళ్ళను క్రింది దించుకొని ఊపిరి పీల్చుకోటంలో తప్పులేదు.

అయితే మనం అంతే బరువు గల మూడు వెయిట్స్ ను వీపుపైకి ఎక్కించు కున్నాము, అని మర్చిపోతున్నాము.

గణిత శాస్త్రంలో strictly equivalent అనే గుర్తు ≣ఉంటుంది. దీనిని సర్వ సమానత్వం అనలేం కానీ గాఠిగా సమానం అనచ్చు.
≅ approximately equal. అంటే సుమారుగా సమానం అన్నమాట.
సోనియా మన్మోహన్ రాహుల్ త్రయాన్ని, మోడీ జైట్లీ రాజ్ నాథ్ త్రయాన్నీ పోల్చి మనం ≅ approximately equal. అంటే సుమారుగా సమానం అనలేం. ≣ గాఠిగా సమానం అనే అనాలి.
రైలు ఛార్జీలు పెంచటం, గవర్నర్లను బలవంతంగా రాజీనామా చేయించటం, పాతవాళ్ళు చేసినవే మేము చేస్తున్నాం అనటం, స్వదేశంలో పనులను తప్పించుకుని విదేశయాత్రలు చేయటం, మెజారిటీలనో మైనారిటీలనో ఎవరినో ఒకరిని మతప్రాతిపదికగానో, కులప్రాతిపదికగానో, ప్రోత్సహించటం ఇవన్నీ ఇరువురి సమాన ధర్మాలు.

కాబట్టి రాబోయే ఐదేళ్ళ పాలన ఇంక దిగజారిపోతుందా మెరుగవుతుందా? దీనికి జవాబు తేలికే. శాసించే పారిశ్రామిక వేత్తలు ఇరువురికీ ఒకరే కదా. శాసించే షేర్ బ్రోకర్లు, పవర్ బ్రోకర్లు ఇరువురికీ ఒకరే ఇంక మార్పేమిటి?

నవభారత్ టైమ్స్ హిందీ దిన పత్రికలో సీపీఐ నేత అతుల్ అంజాన్ అనే సీపీఐ నేత చెప్పిన విషయాలు అక్షరాలా నిజాలు.

अभी तो सरकार भूटान जाएगी, बांग्लादेश जाएगी, यूएस कांग्रेस को संबोधित करेगी। इराक के बारे में जरा देर से सोचेगी: अतुल अंजान (सीपीआई)

తెలుగు సారం: ఇపుడు సర్కార్ భూటాన్ వెళ్తుంది. బంగ్లాదేశ్ వెళ్తుంది. యు ఎస్ కాంగ్రెస్ (అమెరికా వారి లోక్ సభ-దిగువసభ) ను సంబోధిస్తుంది. ఇరాక్ గురించి కొద్దిగా ఆలస్యంగా ఆలోచిస్తుంది.


ऐसा लग रहा है, मोदी जी और यूपीए में प्रतियोगिता चल रही है कि कौन आम आदमी को ज्यादा परेशान कर सकता है: अतुल अंजान(सीपीआई)
తెలుగు సారం: ఎలా కనిపిస్తున్నదంటే, మోడీజీకి మరియు యుపిఎ కి మధ్య ఎవరు ఎక్కువ ఆమ్ ఆద్మీని పరేశాన్ చేస్తారు అనే విషయంలో ప్రతియోగిత (పోటీ -- కాంపిటీషన్) నడుస్తున్నది. రైలు ఛార్జీలను పెంచటం అయిపోయింది. ఎల్ పిజి సిలిండర్ ను నెలకొక పదిరూపాయల లెక్కన పెంచుతారట. నవభారత్ టైమ్స్ వారి వార్త చదవాలనుకునే వారికి లింకు. http://m.nbt.in/text/details.php?storyid=36983632§ion=top-news. క్లిక్.

ఐదేళ్ళ భాజపా రాజ్యంలో ఐదేళ్ళు అంటే 60 నెలలే కదా, అంటే రూ. 600 మాత్రమే కదా పెంచేది, అని సంతోషించండి. అంటే రూ. 412 ఉండేది రూ. 1012 మాత్రమే కదా అయ్యేది.

పెట్టుబడిదారీ విధానంలో పెట్టుబడి పెట్టకున్నా, కాదేదీ వ్యాపారాని కనర్హం

ఉత్తర ప్రదేశ్ సారానాథ్ లో, బుధ్ధుడు మొదటిసారిగా తన బోధను ప్రారంభించిన ప్రదేశంలో, ఉన్న ఒక మర్రి చెట్టు కొమ్మ ఒకటి పెద్దది విరిగి పడిందట.

దాని పవిత్రతను వ్యాపారంగా మలుచుకున్న భిక్షువులు, పరిసరవాసులు, ఆకొమ్మలను చిన్నచిన్న టుకడాలుగా నరికి ప్రపంచ వ్యాప్తంగా వచ్చే బౌధ్ధ యాత్రికులకు అమ్మి సొమ్ము చేసుకుంటున్నారుట.

మహాకవి శ్రీశ్రీ కుక్కపిల్లా, అగ్గిపుల్లా, సబ్బుబిళ్ళా కావేవీ కవితకనర్హం అన్నారు. కావేవీ వ్యాపారానికనర్హం అనికూడ అంటే బాగుండేది.

263 Jaitley Sir: We can't bear world class rail facilities and world class rail fares

263 జైట్లీ మహాత్మా!! మేము ప్రపంచ స్థాయి రైలు సౌకర్యాలను మరియు ప్రపంచ స్థాయి రైలు ఛార్జీలను భరించలేము.

చర్చనీయాంశాలు: రైలు ఛార్జీలు, అరుణ్ జైట్లీ, ప్రపంచీకరణ, బిజెపి, ధన మదం

---

జైట్లీ సార్!! మేము మామూలు మనుషులము. సాదా సీదా జనాలం. కిలోల కొద్దీ బంగారం ఉన్న వాళ్ళం కాము. మమ్మల్ని ఆం ఆద్మీ లు గానే బ్రతకనివ్వండి. ప్రపంచ స్థాయి రైలు సౌకర్యాలను భరించలేము. ప్రపంచ స్థాయి ఛార్జీలను చెల్లించలేము.

ఈసారి రైలు ఛార్జీలను పెంచితే పెంచారు. 2019 లోగా మరల పెంచబోమని హామీ ఇవ్వండి.

ప్రపంచ స్థాయి సౌకర్యాలను ఎవరైనా కోరితే, వారికి ఆ సౌకర్యాలను అంద చేయండి, వారి వద్ద ప్రపంచ స్థాయి ఛార్జీలు వసూలు చేసుకోండి. అదే సమయంలో, వారికి ప్రపంచ స్థాయి సౌకర్యాలను డిమాండు చేసే ఆర్ధిక మదం ఎలా వచ్చిందో కనుక్కొని దిద్దుబాటు చర్యలు మీరు తీసుకుంటారని మేము అనుకోలేము. ఎందుకంటే, ఈ దేశాన్ని పాలిస్తున్న వాళ్ళే ఆర్ధిక మదం ఉన్న వాళ్ళు.

ఎక్స్ ప్రెస్ రైళ్ళలో జనరల్ కంపార్ట్ మెంట్లు

మావి చిన్న కోరికలే. ప్రపంచ స్థాయి కోరికలు కావు. ఎక్స్ ప్రెస్ రైళ్ళలో జనరల్ కంపార్ట్ మెంట్లలో ప్రయాణించేటపుడు 1'.5" x 1'.5' ఒకటిన్నర అడుగులు పొడుగు, ఒకటిన్నర అడుగులు వెడల్పు ఉన్న బల్ల కూర్చోటానికి (కొబ్బరిపీచు లేక స్పాంజి లేక దూది కుషన్ దేవర వారి దయ) మేము నిశ్చిత్ తౌర్ పర్ కోరుకుంటున్నాము.

మా దురదృష్టమేమంటే, రైళ్ళలో ఏడాదికోసారైనా జనరల్ కంపార్టుమెంట్లలో ప్రయాణించే రైల్వే మంత్రులు, సహాయమంత్రులు మాకు దొరకటంలేదు. అందరూ ఛార్టర్ విమానానాల్లోనో, ప్రైవేటు విమానాల్లోనో, హెలీకాప్టర్లలోనో ప్రయాణించే వాళ్ళు కావటంతో ఇక్కడ జనరల్ కంపార్ట్మెంట్ ప్రయాణీకులు ఎలా తన్నుకుంటున్నారో అమ్మహనీయుల కంట పడదు, చెవులకు సోకదు.

ప్రపంచ స్థాయి నిర్వచనం ఏమిటి?

జైట్లీ మహాత్మా!! మీ దృష్టిలో ప్రపంచ స్థాయి అంటే ఏ అమెరికాలోనో, యూరప్ లోనే రైళ్ళలో ఉండే భోగాలు కావచ్చు. ఆఫ్రికా, లాటిన్ అమెరికా రైళ్ళను మీరు చూసి ఉండక పోవచ్చు కాబట్టి ఆ సొగసులు కాక పోవచ్చు.

మా బోటి హాయ్ పొల్లాయ్ ల దృష్టిలో, ప్రపంచ స్థాయి అంటే ప్రపంచ జనాభాలో ఐదవ వంతు ఉండే భారత దేశం ప్రజల స్థాయే. మీరు భారతీయ జనరల్ కంపు రైలు ప్రయాణీకులకు 2.25 చదరపు అడుగుల భూమిని హామీ ఇచ్చారంటే, ప్రపంచ స్థాయిని పై స్థానానికి పారడిమ్ షిఫ్ట్ గా లేపినట్లే.

2.25 చదరపు అడుగుల భూమిని హామీ ఇవ్వటం ఎలా?

కోరిక ఉంటే కష్టం కాదు. ప్రతి ఎక్స్ప్రెస్ రైలుకి ప్రస్తుతం ముందు వెనుక, తగిలిస్తున్న రెండేసి జనరల్ బోగీలకు అదనంగా 3 ప్లస్ 3 ఎదురెదురు సీట్లు ఉండే తరహా బోగీలను రెండేసి జోడిస్తే మొత్తం జనరల్ బోగీలు ఎనిమిది అవుతాయి. కొత్తగా జోడించే నాలుగు బోగీలకు కండక్టర్లను పోస్టు చేసి సీట్ల లభ్యత ఉన్నంత వరకే కూర్చోనివ్వాలి. కంప్యూటరైజ్డ్ బుకింగులు కాబట్టి టికెట్లు జారీ అయేటపుడే సీట్ నంబర్లను ముద్రించే సాఫ్టువేర్లను తయారు చేయటం కష్టం కాదు. కంప్యూటర్లు తప్పు చేయటం, అవినీతికి పాల్పడటం చాల అరుదు కాబట్టి, సీట్లు ఉన్నంత వరకే, టికెట్లను జారీ చేస్తాయి.

ఈనాటి పద్యాలు
జనరల్ కంపు రైలు ప్రయాణీకుల మొరలకు అద్దం పట్టేవి

మహాకవి, సహజ పాండిత్యుడు, తెలంగాణ -ఆంధ్ర భేదాలు తెలియని పామరుడు, బమ్మెర పోతనామాత్యుడు

కలడందురు దీనుల యెడ
కలడందురు పరమయోగి గణముల పాలన్
కలడందురన్నిదిశలను
కలడు కలండనెడి వాడు కలడో లేడో.

శార్దూల వృత్తం, వ్రాయటం కష్టం, పులిలాగ నడుస్తుంది.
లావొక్కింతయు లేదు ధైర్యము విలోలంబయ్యెఁ బ్రాణంబులున్
ఠావుల్ దప్పెను మూర్చ వచ్చెఁ దనువున్ డస్సెన్ శ్రమంబయ్యెడిన్
నీవే తప్ప నితఃపరం బెఱుఁగ మన్నింపందగున్ దీనునిన్
రావే ఈశ్వర కావవే వరద సంరక్షింపు భద్రాత్మకా

262 Logic and Facts leading to scraping of Planning Commission

262 ప్రణాలికా సంఘాన్ని రద్దుచేయటంలో తర్కం, దారితీసిన వాస్తవాలు.

చర్చనీయాంశాలు: 262, ప్రణాలికా సంఘం, బిజెపి, కాంగ్రెస్, ప్రణాలికలు, అర్ధికం

---

ప్రణాలికా సంఘాన్ని రద్దు చేస్తారని వార్తలు వస్తున్న నేపథ్యంలో ఈ పరిస్థితుల వెనుక ఉన్న తర్కాన్ని, వాస్తవాలను, ఇబ్బందులను పరిశీలించటం అవసరం.

ప్రణాలికా సంఘాన్ని 15 మార్చి 1950 నాడు స్థాపించారు. ఆకాలంలో రష్యా (నాటి సోవియట్ యూనియన్ USSR) మనకి ఆదర్శంగా ఉండేది. ప్రణాలికా బధ్ధమైన అభివృధ్ధిలో కొన్ని లాభాలు ఉన్నాయి. జాతికి ఎంత ఆహారం కావాలి, ఎన్ని కోట్లమీటర్ల బట్ట కావాలి, ఎన్ని కోట్ల ఇళ్ళు కావాలి, ఎంత సిమెంటు కావాలి, ఎన్ని ఉక్కు కడ్డీలు కావాలి, ఇలా అన్నీ అంచనాలు వేసుకొని, వాటిని ఉత్పత్తి చేసుకోటానికి టార్జెట్లను నిర్ణయించుకుని, ఆ నిర్దేశించుకున్న లక్ష్యాలను సాధించటానికి కృషిచేయటం ఇదీ వ్యూహం. సరియైనదే.

సోవియట్ యూనియన్ పధ్ధతిలో పంచవర్ష ప్రణాలికలను కూడ తయారు చేసుకుని వాటిని ఎంతో కొంత అమలులోకి తెచ్చే వాళ్ళం. ఇపుడు కూడ పంచవర్ష ప్రణాలికలను తయారు చేస్తున్నాం కానీ, వాటిని చిత్తుకాయితాలుగా వాడుకుంటూ పకోడీలను, బీర్ సీసాలను పొట్లాలు కట్టుకోటానికి ఉపయోగించుకుంటున్నాం.

ప్రణాలికల విధానాన్ని మన్మోహన్ సింగు గారి ఆర్ధిక సంస్కరణలు ఎందుకు గొయ్యి త్రవ్వి పూడ్చ పెట్టాయి?

మన్మోహన్ సింగు గారి సంస్కరణల్లో ప్రభుత్వ సంస్థలకు, ప్రభుత్వ పెట్టుబడులకు చోటు లేదు. కేవలం ప్రైవేటు పెట్టుబడులే. అందులో కూడ విదేశీ ప్రైవేటు పెట్టుబడులకే పెద్ద పీట. మరీ మాట్లాడితే విదేశీ ప్రైవేటు ప్రత్యక్ష పెట్టుబడులకన్నా (FDI), విదేశీ సంస్థాగత పెట్టుబడులకన్నా (FII) లకన్నా, విదేశీ ప్రైవేటు పోర్టు ఫోలియో పెట్టుబడులకు ప్రాధాన్యం. ప్రభుత్వానికి ఇష్టం ఉన్నా లేకపోయినా, ఇదే జరిగింది.

మా పంచవర్ష ప్రణాలికల ప్రకారం మాకు తిండి కోసం ఫుడ్ ప్రాసెసింగు యూనిట్లు అవసరం. మా ప్రణాలికల ప్రకారం మాకు బట్టల ఫ్యాక్టరీలు అవసరం. మాప్రణాలికల ప్రకారం మాకు ఇళ్ళనిర్మాణానికి సిమెంటు, స్టీలు కావాలి, వాటిలో పెట్టుబడి పెట్టండి అంటే విదేశీ ప్రైవేటు పెట్టుబడులు రావు. వాళ్ళు మీకోసం కోబ్రా వైన్ తయారు చేస్తాం. మీకోసం ఆడీ కార్లు తయారు చేస్తాం. మీకోసం సిమ్లాలో ముంబాయిలో బడా హోటళ్ళు నిర్మిస్తాం. గోవాలో జూదగృహాలు నిర్మిస్తాం అంటారు. అంటే మన ప్రణాలికలు అంటే వాళ్ళకి చీపురు పుల్లతో సమానం.

తొమ్మిదవ ప్రణాలిక కాలం నుండి, ప్రభుత్వం తయారు చేసిన పంచవర్ష ప్రణాలికలలో, ప్రైవేటు రంగం వారు ఎన్ని పెట్టుబడులు పెట్టాలో పగటి కలలు కంటూ, గాలిమేడలు కట్టటం మొదలు పెట్టారు. ప్రైవేటు రంగం తనకు లాభం ఎక్కడ ఉంటుందో చూసుకుంటుందే తప్ప దానికి మన ప్రణాలికలతో పని ఏమిటి? ఆవిధంగా పంచ వర్ష ప్రణాలికలు నీరు గారిపోయాయి.

ప్రణాలికా సంఘం ప్రభుత్వ పథకాలకు అడ్డంకుల సంఘం గా తయారయింది. పేదరికం యొక్క తత్వాన్ని అర్ధం చేసుకోలేని మాంటెక్ సింగ్ ఆహ్లువాలియా వంటి వాళ్ళు రోజుకి 26 రూపాయలు, లేక 32 రూపాయలకన్నా ఎక్కువ ఖర్చుచేసే వాళ్లని ధనవంతులక్రింద లెక్కించే తెలివితేటలకు స్థానం ఏర్పడింది.
కొత్త ప్రభుత్వానికి కూడ పంచవర్ష ప్రణాలికలపై నమ్మకం ఉండే అవకాశం లేదు. ఉన్నా ప్రణాలికల లోని ప్రాజెక్టులకు నిధులు పెట్టుబడి పెట్టమని స్వదేశీయ పారిశ్రామికవేత్తలను గానీ, విదేశీయులను గానీ గట్టిగా అడిగే పరిస్థితులు లేవు. ఎందుకంటే గతంలో శ్రీ మన్మోహన్ సింగు గారు, చిదంబరం గారూ భిక్షాపాత్ర పుచ్చుకొని విదేశీ పెట్టుబడులకోసం అమెరికా,యూరప్, కెనడా ల్లో తిరుగుతూ ఇండియన్ ఎయిర్ ఫోర్స్ వారి విమానాలను తుక్కు తుక్కు చేసేవాళ్ళు. ఇపుడు అదే పని, శ్రీనరేంద్రమోడీ, శ్రీ అరుణ్ జైట్లీలు చేయబోతున్నారు. మన నాయకులకు సిధ్ధాంతాలు లేవు. మానావమానాలు లేవు. అక్కడనుండి ఎలాంటి పెట్టుబడులు వచ్చినా స్వాగతమే. మనం వద్దంటే, ఇంకోళ్ళు వాటిని తన్నుకు పోతారు.

కనుక ప్రణాలికా సంఘానికి డెత్ సర్టిఫికెట్ ఇచ్చేసి గోతిలోపూడ్చేయటం, మనం చూడబోయే క్రతువు.

పీపుల్ గెట్ దీ గవర్నమెంట్ దే డిజర్వ్ అంటే ఇదే.

261 Hah hha hhahha! We have passed on the blame to Congress!

261 Hah hha hhahha! We have passed on the blame to Congress!
261 హహ్ హహ్హహ్హ హహ్హహ్హ హహ్హహ్హ !! కాంగ్రెస్ మీదికి నేరాన్ని నెట్టేసామోచ్!!

చర్చనీయాంశాలు: రైళ్లు, బిజెపి, కాంగ్రెస్, నరేంద్రమోడీ, Rail Transport, Narendra Modi, BJP, Congress
బాదుళ్ళకి కొన్ని శాంపుల్స్:

Second Class Monthly Season Ticket (MST) fares of Suburban and Non-suburban shall be charged o­n the basis of 30 single journeys instead of approximately 15 single journeys.

తెలుగు సారం: రెండవ తరగతి నెలవారీ సీజన్ టికెట్ (ఎమ్ ఎస్ టీ) సబర్బన్ (లోకల్), నాన్ సబర్బన్ ఛార్జీలు ఇప్పటిలాగా 15 సింగిల్ ఛార్జీలపై కాక , 30 సింగిల్ ఛార్జీలపై లెక్కిస్తారట.

Revised fare shall also be applicable as per the existing method of computation o­n Quarterly Season Tickets (QST), Half Yearly Season Tickets (HST) and Yearly Season Tickets (YST), etc.

తెలుగుసారం: రివైజు చేయబడిన ఛార్జీలు మూడునెలల సీజన్ టికెట్ లపై (క్యూ ఎస్ టీ), అర్ధ సంవత్సర సీజన్ టికెట్లపై మరియు సాంవత్సరిక సీజన్ టికెట్లపై కూడ వర్తిస్తాయి.

దీనిని బట్టి సీజన్ టికెట్ ధరలు రెట్టింపు అవుతాయేమోననే అనుమానం కలుగుతున్నది.

రైల్ ఛార్జీలు పెంచటం అనివార్యం అనే విషయం భారత్ లో ఉన్న ధరల పరిస్థితులను దృష్టిలో ఉంచుకుంటే, ప్రజలకు అర్ధమయ్యేదే. ఆ సంగతే ప్రజలకు వివరించటం రైల్వే మంత్రి, ప్రధాన మంత్రి, విధి. అంతే తప్ప గత ప్రభుత్వం పెండింగ్ లో పెట్టిన అమలు చేయాల్సిన ఆర్డర్ ను మేము అమలు చేస్తున్నామని గత ప్రభుత్వంపై నెట్టేయటంలో అర్ధం లేదు.

ఇంధనం, నిర్వహణ ఖర్చులు పెరిగినపుడు, ప్రైవేటు వాళ్ళైనా, ప్రభుత్వమైనా, పెట్టుబడి దారీ విధానపు పరిథిలో పనిచేసినంత కాలం ఛార్జీలను ఎప్పటికప్పుడు పెంచుకుంటూ పోవాల్సిందే. గత ప్రభుత్వం 2014 ఎన్నికలను దృష్టిలో ఉంచుకొని పెంచటం అనే నిర్ణయాన్ని వాయిదా వేసి , తప్పును కొత్త ప్రభుత్వంపైకి తోసేయాలని చూడటం మోసపూరితమైన పధ్ధతే. ఇండియన్ నేషనల్ కాంగ్రెస్ వారికి ఒక వెబ్ సైట్ ఉంది. www.inc.in. దీనిలో ఇప్పటికే నరేంద్రమోడీ ప్రభుత్వం ఏదో నేరం చేసినట్లు ఏకేసారు. ఇది తప్పు పధ్ధతి. కత్తులు నూరి సిధ్ధం చేసింది కాంగ్రెస్. ఆకత్తులను వాడింది మోడీ ప్రభుత్వం. తప్పుచేసినా, రైట్ చేసినా ఇద్దరూబాధ్యత తీసుకోవాలి తప్ప ఒకళ్ళ నొకళ్ళు తిట్టుకోటం దారుణం.

పీపుల్ గెట్ ది గవర్నమెంట్ దే డిజర్వ్ అని ఒక సామెత ఉంది. ప్రజలు ఎటువంటి ప్రభుత్వాలకు అర్హులో అలాంటి ప్రభుత్వాలనే పొందుతారు. భారత్ ప్రజలు ఎటువంటి ప్రభుత్వాలకు అర్హులో అలాంటి ప్రభుత్వాలనే పొందుతున్నారు. పాకీస్థానీలు, బంగ్లాదేశీలు, ఇరాకీలు కూడ అంతే. చింతించన్ పని లేదు.

ముందుంది మొసళ్ళ పండుగ

రైలు ఛార్జీలను, డీజెల్ పెట్రోల్ ధరల వలె తరచూ పెంచాల్సి రావచ్చు. 2015, 2016, 2017, 2018 సంవత్సరాలలోకూడ మరల మరల ఈపని చేయాల్సిరావచ్చు. అపుడు కూడ అధికార పక్షం, ప్రతిపక్షం ఒకరిపై ఒకరు ఆరోపణలు చేసుకుంటూ, నిర్ణయాలను వాయిదా వేసుకుంటు రైల్వేలను కుదుపులకు గురి చేయటం నీచం అవుతుంది.

పరిష్కారాలు లేవా?

లేకేమీ, ఉన్నాయి. కానీ అమలుకు చాలా కష్టపడాలి. పెట్టుబడి దారీ విధాన పరిథిలో ఒక పది పరిష్కారాలు:

1. రైల్వేలు ఫ్రైటేతర ఆదాయాన్ని (వస్తువుల రవాణా ఫ్రయిట్), ఛార్జీలేతర ఆదాయాన్ని పెంచుకోటానికి కృషి చేయాలి. రైల్వే స్టేషన్ల ఇన్ గేట్, అవుట్ గేట్ ల మధ్య కాంపౌండ్ వాల్స్ ప్రక్కనే ఉన్న స్థలాలలో షాపింగ్ కాంప్లెక్సులను నిర్మించి అద్దెకి ఇవ్వ వచ్చు.

2. పట్టాల వెంట ఉండే ఖాళీ స్థలాలు, పట్టాలకు హైవేలకు మధ్యఉండే వాటిని షాపింగ్ కాంప్లెక్సుల, చిన్న వ్యాపారాల నిర్వహణకు స్వల్పకాలిక లీజులకు ఇవ్వవచ్చు.

3. వాణిజ్య లీజులకు ఇవ్వటానికి వీలు కాని ఇరుకు వాటిని, జానస్ టైప్ లో రోడ్ ముఖం, పట్టాల ముఖం భారీ హోర్డింగులు నెలకొల్పుకోటానికి లీజు కివ్వచ్చు.

4. సోలార్ ప్యానెల్స్ నెలకొల్పుకోటానికి లీజులకివ్వ వచ్చు.

5. పై వేటికీ పనికిరాని వాటిని సోషల్ ఫారెస్ట్రీ (సుబాబుల్), పండ్ల, పూల తోటల పెంపకానికి లీజులకివ్వవచ్చు.

6. పైకప్పు ఉన్న గూడ్సు వ్యాగెన్ లపై సోలార్ ప్యానెల్స్ నెలకొల్పి, వాటినుండి వచ్చే విద్యుత్ ను రైళ్ళను నడుపుకోటానికి సపోర్టుగా వాడచ్చు.

7. రైల్వే ప్లాట్ ఫారాలను విస్తరించి అదనపు షాపులకు, బ్యాంకు ఎటీఎమ్ లకు, అదనపు హోటళ్లకు స్వల్ప కాలిక కిరాయి కివ్వవచ్చు. స్థలాలు ఉంటే ప్లాట్ ఫారాల మీదే కల్యాణ మంటపాలను నిర్మించి గంటల లెక్కన కిరాయికి ఇవ్వవచ్చు.

8. లాంగ్ డిస్టెన్స్ రైళ్లలోపల బ్యూటీ క్లినిక్కులు, ఇంటర్నెట్ కేఫ్ లు, శిక్షణా సంస్థలు, బుక్ ఎగ్జిబిషన్ లు, వస్త్రాలు, పాదరక్షల ప్రదర్శనలు, మొబైల్స్ ప్రదర్శనలు నెలకొల్పుకోటానికి రోజుల లెక్కన, నెలల లెక్కన, కిరాయికి ఇవ్వవచ్చు.

9. రైళ్లలోనే కల్యాణ మంటపాలను నిర్మించి ప్రయాణ సమయంలోనే వివాహా కార్యక్రమాలను నిర్వహించుకోటానికి కిరాయికి ఇవ్వ వచ్చు.

10. అఖిల భారత సేల్స్ కాంపెయిన్స్ నిర్వహించుకోటానికి ప్రత్యేక ఎగ్జిబిషన్ రైళ్ళను నిర్మించి కార్ల తయారీదారులకి, వాషింగ్ మెషిన్ లు, టీవీలు, చవక నగల , అమ్మకందారులకు కిరాయికి ఇవ్వ వచ్చు. మొ|| ఇలా ఎన్నైనా సాధ్యమే.

వీటిని చేయక పోతే రైలు ప్లాట్ ఫారాలు, పట్టాల పక్క స్థలాలు మురికి కూపాలుగా మారటమే కాకుండా, ఆక్రమణల పాలయ్యే అవకాశం ఉంది.

కోరిక ఉంటే మార్గం ఉంటుంది.

మీరు మార్క్సిజం అంటున్నారు. ఈసమస్యను మీరు మార్క్సిజం లో ఎలా పరిష్కరిస్తారు?

నేను ప్రతిపాదించే మార్క్సిజంలో రైళ్లకు ఛార్జీలు ఉండవు. అన్నీ ఫ్రీ. వీలైనంతవరకు పని స్థలానికి, నివాసానికి దూరాన్ని తగ్గించే ప్రయత్నం చేస్తారు కాబట్టి, అనవసర ప్రయాణాల అవసరమే ఉండదు. ఉన్నా ఛార్జీలు ఉండవు.

వీలైనంత వరకు దిగుమతి ఇంధనంపై ఆధారపడటం తగ్గించుకొని, సూర్యశక్తి, కెరటాలశక్తి, వాయుశక్తి, బహుశా హైడ్రోజన్ ఇంధనం వంటి సాంప్రదాయేతర ఇంధనాలపై దృష్టి పెట్తేకానీ, వీదేశీ పెట్టుబడిదారుల కబంధ హస్తాల నుండి బయట పడలేము.

260 गुमशुदगी Missing కనపడుట లేదు

చర్చనీయాంశాలు: 260, AAP, ఆమ్ ఆద్మీ , తాడేపల్లిగూడెం, ఏలూరు, నర్సాపురం, పశ్చిమగోదావరి, మన రైల్వేలు

---

ఈనాటి హిందీ పదం

गुमशुदगी Missing కనపడుట లేదు

गुमशुदगी కి హిందీ భాషలో ప్రస్తుతం వాడే సందర్భం వ్యక్తులు అదృశ్యం కావటం. స్వయంగా వెళ్ళిపోటం వల్ల కానీ, కిడ్నాప్ చేయబడటం చేత కానీ, ఇతర కారణాల వల్ల గానీ ఇది జరగవచ్చు. కనపడని వ్యక్తుల కొరకు కరపత్రాలు, పోస్టర్లు అచ్చుకొట్టించినపుడు, తెలుగులో మనం ఎక్కువగా వాడే పదం ''కనబడుట లేదు''. హిందీ వారు వాడే పదం गुमशुदगी.

వోట్లు వేయించుకుని నియోజక వర్గంలో కనిపించకుండా మాయమైన కార్పోరేటర్లు, శాసన సభ్యులు, ఎంపీల, మంత్రుల, విషయంలో కూడ गुमशुदगी ని వాడచ్చేమో.

నవభారత్ టైమ్స్ దినపత్రిక ప్రచురించిన ఈవార్తను చూడండి. (లింకును క్లిక్ చేస్తే నవభారత్ టైమ్స్ కి వెళ్తారు.) http://m.nbt.in/text/details.php?storyid=36727792§ion=top-news క్లిక్ मनीष सिसोदिया गायब! गुमशुदगी के पोस्टर మనీష్ సిసోదియా గారు గాయం (మాయం)!! గుమ్ సూద్ గీ కే పోస్టర్!!

ఆం ఆద్మీ పార్టీ అగ్రనేతలలో మనీష్ సిసోదియా గారు ఒకరు. వీరి నియోజక వర్గం ఢిల్లీలోని పట్ పడ్ గంజి. వీరు గత డిసెంబర్ ఢిల్లీ అసెంబ్లీ ఎన్నికలలో విజయం తరువాతనుండి కనిపించటంలేదుట.

ఈ పోస్టర్ ను తనను ఆం ఆద్మీ గా చెప్పుకున్న అజయ్ వాలియా అనే మహాశయుడు వేయించాడుట. సారం ఏమిటంటే పట్ పడ్ గంజ్ ప్రజలు తీవ్ర విద్యుత్, నీటి కొరతను ఎదుర్కుంటున్నారుట.

సిసోదియా గారి ప్రకారం, ఇది హతాశులైన కాంగ్రెస్ లేక బిజెపి వారి కుట్ర. సిసోదియా గారి మాటలలోనే:

मैं तो अपने इलाके में ही हूं, लेकिन शायद कांग्रेस और बीजेपी के लोगों को यह नहीं दिख रहा, क्योंकि मैं रोज अलग-अलग इलाकों में जाकर मोहल्ला सभाएं कर रहा हूं और लोगों से पूछ रहा हूं कि एमएलए फंड के रूप में स्वीकृत की गई राशि को किन कामों पर खर्च करना है?

తెలుగుసారం: నేనైతే నానియోజకవర్గంలోనే ఉన్నాను, కానీ బహుశా కాంగ్రెస్ మరియు బిజెపి వాళ్ళకి ఇది కనపడుతూ ఉండక పోవచ్చు. ఎందుకంటే, నేను రోజూ బస్తీల్లోకి వెళ్ళుతున్నాను. అక్కడి ప్రజలను అడుగుతున్నాను, ''ఎం ఎల్ ఎ నిధులను ఏఏ పనులకై ఏవిధంగా ఖర్చు చేయాల'' ని అడుగుతున్నాను.

'आप' के सांसदों ने लोकसभा तक में दिल्ली की बिजली कटौती का मामला उठा दिया है। हमारे विधायक और सांसद इस मामले में एलजी से भी मिले और केंद्रीय ऊर्जा मंत्री को भी चिट्ठी लिखी, लेकिन दिल्ली से बीजेपी के 7 सांसद इस मामले में क्या कर रहे हैं, इसका भी जवाब बीजेपी को देना चाहिए। उन सांसदों से पूछा जाना चाहिए कि उन्होंने संसद में इस मसले को क्यों नहीं उठाया?

తెలుగు సారం: ఆప్ యొక్క సభ్యులు లోక్ సభ వరకు దిల్లీ యొక్క విద్యుత్ సమస్యను లేవనెత్తారు. మాశాసనసభ్యులు , ఎంపీలు, ఈ విషయంలో లెఫ్టినెంట్ గవర్నర్ గారిని కూడ కలసారు. కేంద్ర విద్యుత్ మంత్రి గారికి లేఖ వ్రాశారు. కానీ, బిజెపి యొక్క ఏడుగురు ఎంపీలు ఈ విషయంలో, ఏమి చేస్తున్నారో, ఆ పార్టీవారే జవాబివ్వాలి. ఈ సమస్యను పార్లమెంటులో ఎందుకు లేవనెత్తలేదు, అనే విషయాన్ని ఆ పార్టీ సభ్యులనే అడగాలి.

వైబీరావు గాడిద వ్యాఖ్యలు

దేశ రాజధాని ఢిల్లీలో ప్రజలు ఎంతో సుఖంగా ఉన్నారని, రాయలసీమ ఎడారిలో ఉండే మనం కంగారు పడనక్కర లేదు. బిజిలీ కిల్లత్ (విద్యుత్ కొరత), పానీ కిల్లత్ (నీటి కొరత) ఆమ్నీ ప్రజెంట్ (సర్వాంతర్యామి).


ఈ మధ్యనేను తాడేపల్లి గూడెం (పశ్చిమ గోదావరి జిల్లా) రైల్వే స్టేషన్ లో తరచుగా రైలు దిగటం, రైలు ఎక్కటం చేయవలసి వచ్చింది. ఆరైల్వే స్టేషన్ లో కోల్ కత్తా చెన్నై మెయిన్ లో పోయే దాదాపు అన్ని రైళ్ళూ ఆగుతాయి. రైలు కొరకు వేచి ఉన్న సమయంలో నాకు సహ ప్రజలను గమనించటం అలవాటు. అన్ని రైళ్ళలోని ప్యాసింజర్లు బాటిల్సు పట్టుకొని రైళ్ళలోంచి దిగటం, సీసాలను పంపు నీళ్ళతో నింపుకోటం, మరల కదిలిన తమ రైలును పట్టుకోటం సుదర్శనం. చూడలేనిది ఏమిటంటే, ఆతరువాత ఆబాటిల్ నీళ్ళను పిల్లలకు పట్టించాలని ప్రయత్నించినపుడు వాళ్ళు తుపుక్కుమని ఉమ్మేయటం. ఆనీళ్ళు కటికి అరుచి కరమైనవి. తాగటం చాల కష్టం. ప్లాట్ ఫారాలపై రెండు కూలర్లను కూడ పెట్టారు. వాటిలో కూడ ఈ నీళ్ళే.

వాటర్ బాటిల్స్ షాపు కాంట్రాక్టర్లు మాత్రం ప్రతి బాటిల్ కు ఎం ఆర్ పీ కన్నా కనీసం ఐదు రూపాయలు పెంచేసి తమ వ్యాపారం తాము చేసుకుంటూ పోతున్నారు. ఈ ఎం ఆర్ పీ కన్నా ఎక్కువకు అమ్మే అలవాటు నీటి విషయంలోనే కాదు, ప్రతి వస్తువు విషయంలో ఉన్నది. ఉదాహరణకు, హల్దీరాం కంపెనీ వారి అటుకుల ప్యాకెట్ బయట ఐదు రూపాయలకి అమ్మేది అక్కడ ఏడు ఎనిమిది రూపాయలు. ఇష్టమైతే తీసుకో, లేకపోతే లేదు. కంప్లెయింటు బుక్ అడగమని ఆషాపులోనే బోర్డు ఉంది. కంప్లెయింట్ బుక్ అడిగితే ఆ నిర్వాహకుడు చాల అవమానకరంగా మాట్లాడాడు. చివరికి దిగివచ్చి ముద్రిత ధర ఐదురూపాయలకే ఇచ్చాడు తప్ప కంప్లెయింటు బుక్ ని ఇవ్వలేదు. త్రాగు నీళ్ళ బాటిల్స్ విషయంలో కంప్లెయింట్ బుక్ అడగటం వంటి పప్పులేమీ ఉడకవు. సరే, దుకాణాల వాళ్ళకు, సేల్స్ బాయ్స్ కి వాళ్ళ సమస్య లేవో వాళ్ళకి ఉంటాయి.

వ్రాయాల్సిన ముఖ్యవిషయం ఏమిటంటే, తాడేపల్లి గూడెం రైల్వే స్టేషన్ గోదావరి కాలువ ప్రక్కనే ఉన్నది. థార్ ఎడారిలో లేదు. రైల్వే శాఖవారు తాడేపల్లి మునిసిపాలిటీ వారిని సంప్రదించి రోజుకి ఒకటి రెండు టాంకర్ల మంచి నీటిని స్టేషన్ లోని కూలర్లను (ప్లాట్ ఫారం పై అన్ని కుళాయిలను కాదు) నింపుకోటానికి సేకరించలేరా? ఈవిషయంలో తాడేపల్లిగూడెం శాసన సభ్యుడు, ఏలూరు, నర్సాపురం ఎంపీలు చొరవ తీసుకోలేరా?

మన ఎంపీలకు ఆదాయం, సంపదల మధ్య వ్యత్యాసాలను తొలగించే దిశలో కృషిచేయటంలో కోరిక, తీరిక, ఓపిక లేవు, సరే, కనీసం రోజుకు ఒక ట్యాంకర్ మంచినీటిని తాడేపల్లిగూడెం రైల్వే స్టేషన్ కి ఏర్పాటు చేయలేరా?

గెలిచే నేతలు టపాకాయలు కాల్చుకుంటూ గజమాలలు వేయించుకుని ఊరేగటంలో చూపే శ్రధ్ధలో ఆరో వంతు రైల్వే స్టేషన్లను, బస్ స్టాండులను దర్శిస్తే కనీసం త్రాగేటందుకు నీళ్ళైనా దొరుకుతాయి.

गुमशुदगी నా?

ఈనాటి పాట

చిత్రం: ఆకలి రాజ్యం. తెరమీద: కమల్ హాసన్. గానం: బాలసుబ్రహ్మణ్యం. మహా కవి ఆత్రేయ. స్వరాలు: ఎం. ఎస్. విశ్వనాథన్.

సాపాటు ఎటూ లేదు పాటైనా పాడు బ్రదర్ ||సాపాటు ||
రాజధాని నగరంలో వీధి వీధి నీది నాదే బ్రదర్
స్వతంత్ర దేశంలో చావు కూడా పెళ్లి లాంటిదే బ్రదర్
||సాపాటు||
రాజధాని నగరంలో వీధి వీధి నీది నాదే బ్రదర్
స్వతంత్ర దేశంలో చావు కూడా పెళ్లి లాంటిదే బ్రదర్


మన తల్లి అన్నపూర్ణ మన అన్న దాన కర్ణ
మన భూమి వేద భూమిరా తమ్ముడూ
మన కీర్తి మంచు కొండరా ||మన తల్లి...కొండరా||
డిగ్రీలు తెచ్చుకుని చిప్ప చేత పుచ్చుకుని
ఢిల్లీకి చేరినాము దేహి దేహి అంటున్నాము
దేశాన్ని పాలించే భావి పౌరులం బ్రదర్
||సాపాటు ...పెళ్లి లాంటిదే బ్రదర్||


బంగారు పంట మనది మిన్నేరు గంగ మనది
ఎలుగెత్తి చాటుతామురా ఇంట్లో
ఈగల్ని తోలుతామురా
ఈ పుణ్య భూమిలో పుట్టడం మన తప్పా ||ఈపుణ్య||
ఆవేశం ఆపుకొని అమ్మా నాన్నదే తప్పా ||ఆవేశం||
గంగలో మునకేసి కాషాయం కట్టెయ్ బ్రదర్
||సాపాటు ...పెళ్లి లాంటిదే బ్రదర్||


సంతాన మూలికలం సంసార బానిసలం
సంతాన లక్ష్మి మనదిరా తమ్ముడూ
సంపాదనొకటి బరువురా ఓ...
చదవెయ్య సీటు లేదు చదివొస్తే పనీ లేదు
అన్నమో రామ చంద్ర అంటే పెట్టే దిక్కే లేదు
దేవుడిదే భారమని తెంపు చేయరా బ్రదర్
||సాపాటు ... పెళ్లి లాంటిదే బ్రదర్||

వైబీరావు గాడిద వ్యాఖ్యలు

ఈ పాటలో వ్రాసిన విషయాలు భారత పౌరులకు, తెలుగు ప్రజలకు వర్తిస్తాయి కానీ, ఇందులో పెదవులాడించిన శ్రీ కమల్ హాసన్ కి , శ్రీమతి శ్రీదేవికి వర్తించవు. తస్మాత్ జాగ్రత్త.

259 Andhra Pradesh will suffer from politicians who do not bother about right and wrong.

259 Andhra Pradesh will suffer from politicians who do not bother about right and wrong.
259 ఉచితానుచితాలు తెలియని రాజకీయ వేత్తలతో ఆంధ్రప్రదేశ్ అష్టకష్టాలు పడుతున్నది, పడబోతున్నది

చర్చనీయాంశాలు: 259, చంద్రబాబు, వ్యవసాయ ఋణాలు

---

తమ స్వార్ధమే తప్ప, ప్రజలకు కలిగే లాభనష్టాలను గురించి పట్టించుకోని రాష్ట్ర రాజకీయనేతలలో అగ్రపీఠం శ్రీచంద్రబాబు నాయుడు గారికివ్వాలా, శ్రీజగన్ కి ఇవ్వాలా అనే విషయాన్ని నిర్ధారించటం కష్టం.

ఉదాహరణ: శ్రీచంద్రబాబుకి, తాను అధికారంలోకి రావాలి, అని కోరిక. ఆకోరిక తీరాలంటే, వ్యవసాయ ఋణాల రద్దు అనే ఎర వేయాలి, కాబట్టి వెంటనే వేసేసి సీమాంధ్రప్రదేశ్ వోట్ల చెరువును కొల్లగొట్టి అధికారాన్ని చేజిక్కించుకున్నాడు. వ్యవసాయ ఋణాలను రద్దుచేయటానికి నిధులు లేవని శ్రీచంద్రబాబుకి ముందే తెలుసు. రాహుల్ గాంధీ కూడ, కొంత ఆలస్యంగానైనా ఈవాగ్దానాన్ని చేశాడు కాబట్టి, కాంగ్రెస్ అధికారంలోకి వచ్చి ఉంటే, శ్రీ చంద్రబాబుకి కేంద్రం మద్దతుతో తన వాగ్దానాన్ని నెరవేర్చటం తేలికయ్యేది. శ్రీనరేంద్రమోడీ, వ్యవసాయ ఋణాల రద్దు వాగ్దానాన్ని చేయలేదు. బిజెపికి ఆకాశమంత మెజారిటీ రాకుండా ఉంటే, వాళ్ళకి శ్రీచంద్రబాబుగారి పదహారు ఎంపీల మద్దతు అవసరమయ్యేది. కింగ్ మేకర్ లాగా ప్రవర్తించి ఉండేవాడు. ఢిల్లీనుండి నిథులను సాధించి ఋణాల రద్దుచేసి ఉండేవాడు. ఇపుడు శ్రీనరేంద్రమోడీని,శ్రీ అరుణ్ జైట్లీలను అడుక్కోటం తప్ప, శ్రీచంద్రబాబు చేయగలిగిందేమీ లేదు.

రైతులను లోన్లు కట్టద్దని చెప్పటం ఘోర తప్పిదం

నేను అధికారంలోకి వచ్చాక మీ ఋణాలను రద్దు చేస్తాను, కాబట్టి వాటిని కట్టద్దని రైతులకు బోధించటం, చంద్రబాబు చేసిన ఘోరమైన తప్పిదం. మీలో అప్పు పుట్టించుకోగల శక్తిఉన్నవాళ్ళు ఎక్కడో అక్కడ డబ్బు తెచ్చుకుని, ఋణాలను కట్టి, ఇంకా ఎక్కువ మొత్తంలో బ్యాంకులనుండి ఋణాలను పొందండి. నేను అధికారంలోకి వచ్చాక, మీరు కట్టి రెన్యూ చేయించుకున్న ఋణాలను కూడ నేను మాఫీ చేయిస్తాను, అని శ్రీ చంద్రబాబు చెప్పి ఉంటే నేడు అందరు రైతులు త్రిశంకు స్వర్గంలో వ్రేలాడటం తప్పేది.

ఇపుడు శ్రీచంద్రబాబు నియమించిన కమిటీ ఏమి సిఫార్సులు చేస్తుందో, నిథులను ఎక్కడినుండి తెమ్మని చెప్తుందో, వాటిని ఎప్పుడు ఎలా తెస్తారో, ఆదేవుడికే తెలియాలి. బ్యాంకుల ఋణాల రెన్యుయల్స్ ఆగిపోయి, వాటి ఎన్ పీ ఎలు పెరిగిపోయాయి. రికవరీ పర్సెంటేజీ సున్నాగా మారింది. మామూలుగా రైతులలో ఒక సాంప్రదాయ పధ్ధతి ఏమిటంటే వాళ్ళు ఎక్కడో అక్కడ నాలుగైదు రోజులకి వడ్డీపై అప్పు తెచ్చుకుని, బ్యాంకు అప్పులను కట్టి, నాలుగైదు రోజుల తరువాత తమ అప్పును రెన్యుయల్ పధ్ధతిలో తిరిగి తీసుకుని, ఆసీజన్ కి మంచి ఋణగ్రహీతగా గట్టెక్కుతారు. అలాంటి రైతుల ఎడల బ్యాంకర్లుకూడ కొంత ఉదారంగా ఉండి కనీసం వడ్డీ మేరకైనా ఋణ పరిమితినిపెంచి, రైతుకు ఎంతో కొంత ఊరట కలిగించటం జరుగుతుంది. ఇపుడు చంద్రబాబు సంప్రదాయ పధ్ధతి డొక్కలో ఒక్క పోటు పొడిచాడు. ఋణాలను తిరిగి ఇవ్వమని ఒక స్టేట్ మెంటు పారేసి, బ్యాంకర్లు జుట్టు పీక్కునేలాగా చేస్తున్నాడు.

చిన్నయ సూరి వ్రాసిన ఒక వాక్యం కరెక్టు వర్డింగు నాకు గుర్తుకు రావటం లేదు. చిన్నయ సూరి మిత్రలాభం లేక మిత్రభేదం గుర్తుకు ఉన్న పాఠకులు ఆవాక్యాన్ని కామెంట్లో వ్రాస్తే కృతజ్ఞుడనై ఉంటాను.

'' గ్రావంబును గ్రావాగ్రంబునకు ఎక్కించుట కష్టం. క్రిందికి త్రోయుట సులభం.'' అంటే ఒక బండను కొండ శిఖరంపైకి ఎక్కించటం కష్టం. పైన ఉన్నదానిని క్రిందికి తోసేయటం తేలిక.

క్రొత్త దుష్ట సాంప్రదాయం

చంద్రబాబు నెలకొల్పిన క్రొత్త దుష్టసాంప్రదాయం ఏమిటంటే, ఇప్పటి వరకు జరిగిన వ్యవసాయ ఋణ మాఫీలన్నీ, కేంద్రప్రభుత్వ బాధ్యతతో, కేంద్ర ప్రభుత్వనిధులతో జరిగాయి. మొదటిసారిగా రాష్ట్రప్రభుత్వ నిధులతో మాఫీ చేయటాన్ని శ్రీచంద్రబాబు గొప్పగా చెప్పుకున్నారు. ఫలితంగా ఏమి జరగచ్చంటే, భవిష్యత్ లో కేంద్ర ప్రభుత్వం కాడిని పక్కన పారేసి తప్పించుకునే అవకాశం ఉంది. ఋణ మాఫీ రాష్ట్ర ప్రభుత్వాల బాధ్యత అని పాస్ ఆన్ ది బక్ చేసేటందుకు కేంద్రం వెనుకాడదు. కేంద్రప్రభుత్వ ఆర్ధిక శక్తి ఇంచుమించు అపరిమితం (రిజర్వు బ్యాంకు చేత కొత్త నోట్లు ప్రింటింగు చేయించ గలదు) కాగా, రాష్ట్ర ప్రభుత్వాల ఆర్ధిక శక్తి పరిమితం కావటం వల్ల అవి ప్రజలకు నరకాన్ని చవి చూపే అవకాశం ఉంది.

258 Renunciation born from awareness is more important than prostrations and prayers

258 Renunciation born from awareness is more important than prostrations and prayers
258 సాష్టాంగ నమస్కారాల కన్నా జ్ఞాన జనిత వైరాగ్యం ముఖ్యం
చర్చనీయాంశాలు: గవర్నర్లు, వైరాగ్యం, పోతన, తిరుమల, భాగవతం, చంద్రబాబు

---

డెక్కన్ క్రానికల్ పత్రికవారి దయతో ఈక్రింది చిత్రాన్ని చూడండి.
బంగాల్ గవర్నర్ గారు, ఆంధ్రప్రదేశ్ గవర్నర్ గారు ఎంతటి భక్తవరేణ్యులోకదా. మన గవర్నర్లు నిరక్షరాస్యులు కాదు. విద్యాధికులు, మేధావులు, కానీ దురదృష్టవశాత్తు అప్లికేషన్ ఆఫ్ మైండ్ చేయలేని, అనిర్వచనీయ కారణాల వల్ల స్థగ్ధులు.





మీడియాలో వచ్చిన, నాచేత సుందరీకరణ చేయబడిన, ఈచిత్రాన్ని చూడండి!!

ఆంధ్రప్రదేశ్ గవర్నర్ గారు ఎంత చక్కగా సాష్టాంగ పడుతున్నారో. ఇది మొదటి సారీ అవదు, చివరిసారీ అవదు. తన పదవీకాలంలో శ్రీగవర్నర్ గారు ఎన్నిసార్లు తిరుమల సందర్శించారో, ఎన్నిసార్లు అధికారికమో, ఎన్నిసార్లు అనధికారికమో, ఎన్నిసార్లు హెలికాప్టర్లను | కిరాయి విమానాలను | అరువుతీసుకున్న ప్రైవేటు హెలికాప్టర్లు, బదులు తీసుకున్న ప్రైవేటు విమానాలను వాడారో, ఎన్నిసార్లు ఎయిర్ ఇండియా విమానాలను | రైళ్ళను | బస్సులను (ఏమో!!) వినియోగించారో లెక్కలు లేవు.

ఏ మతానికి చెందిన వాళ్ళైనా- సరే దేవుళ్ళు ఉన్నట్లు ఋజువులు లేవు.

సూపర్ హ్యూమన్ పవర్సు అంటే మానవాతీత శక్తులు ప్రకృతిలో ఉంటే ఉండ వచ్చు. వాటిని మనం దేవుడు(త) అని పేరు పెట్టి ప్రార్ధనలు చేసినా, సాష్టాంగపడినా, అవి మనలని దయతలుస్తాయనటానికి అసలు ఆధారాలే లేవు.

దేవుడు ఉన్నాడు అని తాత్కాలికంగా అనుకున్నా, అతడు సగుణుడా (ఆకారం కలవాడా), నిర్గుణుడా (ఆకారం లేని వాడా) స్పష్టం కాలేదు.

యోగులు, జ్ఞానులు దేవుడు నిరాకార సచ్చిదానంద పరబ్రహ్మం అంటే పూజారులు, స్వాములవార్లు, విగ్రహాల్లో దేవుడు ఉండటమే కాక, ఆయనను ప్రతిష్ఠించేటపుడు మేము చదివే మంత్రాల వల్ల, చేసే హోమాలు, పూర్ణాహుతులు, కలశాభిషేకాలు, ప్రోక్షణాల వల్లనే, విగ్రహాలకు శక్తి వస్తుంది అని ప్రచారం చేసుకుంటున్నారు.

స్టేజీల మీద పురాణాలు చెప్పే వాళ్ళు బయలుదేరి, మేము సమన్వయ పరుస్తున్నాం, అడిగిన వాళ్ళకి దేవుడు సగుణంగా (రూపంతో) విగ్రహంగా కనిపించి మన పూజలు అందుకుంటాడు. నిర్గుణంగా కావలసిన వాళ్ళకి కేవలం బ్రహ్మానందానుభవం రూపంలో వ్యక్తం అవుతున్నాడు. ఎవరికి కావలసినట్లు వాళ్ళకి దొరుకుతాడు , అని చెప్పి తమ ఉపన్యాసాలకు తమ దక్షిణలను తాము పోగుచేసుకుంటున్నారు.


కొందరు యోగులు, జ్ఞానుల ప్రకారం, విగ్రహారాధన అనేది దైవం మనసును నిలుపుకోటానికి మొదటి మెట్టే, ప్రతి వ్యక్తీ సగుణంలోనుండి నిర్గుణంలోకి మనసు నిలపటం అలవాటు చేసుకోక పోతే వాడికి మోక్షం ఉండదు, అంటూ బోధిస్తూ ఉంటారు.

ఇపుడు మన రాష్ట్ర గవర్నర్ శ్రీ నరసింహన్ గారు ధ్వజస్థంభాల ముందు సాష్టాంగ పడుతున్నారు కాబట్టి మొదటి మెట్టులో ఉన్నట్లా , చివరి మెట్టులో ఉన్నట్లా? ఎన్నో ఏళ్ళబట్టి విగ్రహారాధన చేస్తున్న గవర్నర్ వారికి, నిర్గుణోపాసనపై ఎందుకు మనసు పోవటంలేదు?

గవర్నర్లకు, ముఖ్యమంత్రులకు నిర్గుణోపాసనపై ఎందుకు మనసు పోవాలి?

గవర్నర్ల వలెనే, ముఖ్యమంత్రులు, ప్రధాన మంత్రులు, కేంద్రమంత్రులు, రాష్ట్ర మంత్రులు, ఐఎఎస్, ఐపీఎస్ అధికారులు, స్వాములవార్లు, వీళ్ళంతా జాతికి మార్గ దర్శకుల క్రింద లెక్క. మరి వీళ్ళే విగ్రహారాధనలో కూరుకుపోయి, విఐపి దర్శనాలు మరల మరల పొందుతూ, సామాన్యులను ఇక్కట్ల పాలు చేస్తున్నారంటే, లోపం ఎక్కడున్నట్లు? ఎనిమిదిన్నర కోట్లమంది తెలుగు ప్రజలలో, ఎనిమిదింపాతిక కోట్లమంది అజ్ఞానులు, పాతిక లక్షల మంది జ్ఞానులు అనుకోటం కుదరదు. ఎందుకంటే, జ్ఞాని అయిన వాడు జ్ఞాని లాగా కనపడడు.

వైబీరావు గాడిద సూచన

దీనికి ఒక పరిష్కారం ఉంది. ప్రతి వ్యక్తీ ఆత్మ పరీక్ష చేసుకోటం. అసలు దేవుడు(త) ఉన్నాడా(ఉన్నదా). ఉండెను పో, సగుణుడా, నిర్గుణుడా, రెండునా, రెండూ కాదా?

నేను జ్ఞాన సముపార్జనలో ఏదశలో ఉన్నాను? నేను దేవుడు ఉన్నాడని నమ్మితే, అతడు నిర్గుణుడైన సచ్చిదానంద బ్రహ్మం, అని గ్రహించటానికి ఏమిటి అడ్డంకి? దేవుడు సచ్చిదానంద బ్రహ్మం, బ్రహ్మానందానుభవం ద్వారా మాత్రమే గ్రహించవలసిన, నాలోనూ, నా బయటా ఉన్న ఒక దివ్య శక్తి, అని గ్రహించినపుడు, దేవుడు(త) సర్వాంతర్యామి అని అర్ధం చేసుకున్నప్పుడు, నేను తిరుమల వెళ్ళటం అనవసరం, అనే జ్ఞానం మన వీవీఐపీలకు, వీఐపీలకు ఎందుకు కలుగదు? వారికి ఆజ్ఞానం కలిగినపుడు, కమ్మి ఉన్న అజ్ఞానం తొలగినపుడు, వారు తిరుమల వెళ్ళరు. సాష్టాంగ పడరు. దివ్యానుభవాన్ని (అది ఉంటే) ఇంట్లోనే పొందుతారు.

ఇది జరిగినపుడు, తిరుమలలో సామాన్యుడికి సగుణ విగ్రహారాధాన , దర్శనం తేలికవుతుంది. రకరకాల దర్శనాల టిక్కెట్లు పెట్టి, సామాన్య జనాన్ని తాము చూడాలనుకుంటున్న విగ్రహాన్నైనా సరిగా చూడనివ్వకుండా, విఐపీల సేవలో తరించే దేవాలయ పాలకాధికార గణానికి కనువిప్పుకావాలి. వారు టిటిడీ భక్తి ఛానెల్ లో, నిర్గుణోపాసన అనే పైమెట్టుకు, సగుణ భక్తులను ఎక్కించటానికి, అవసరమైన ఉపన్యాసాలను, నాటక నాటికలను, సంగీత కార్యక్రమాలను ఏర్పాటు చేస్తారు.

ఈలోపల, లడ్డూ ప్యాకెట్ల సంచి భుజానికి తగిలించుకొని తిరుమల అర్చక దళాల వారు ముఖ్యమంత్రుల చుట్టూ, రాష్ట్రమంత్రుల చుట్టూ, ప్రధానమంత్రి- రాష్ట్రపతి చుట్టూ , కేంద్రమంత్రుల చుట్టూ తిరిగి వారిని తిరుమల దర్శించమని అర్ధించటం మానేయటం అవసరం. అర్చకుల ప్రధాన విధి వివిఐపీలను,వీఐపీలను కాకా పట్టటం కాదు. దేవాలయానికి వచ్చే భక్తుల సంఖ్యను పెంచటం, దేవాలయాదాయాన్ని పెంచటం, ప్రసాదాల్లో వాటాలను పంచుకోటం, ఇవి వారి విధులు కానే కావు. ప్రతి అర్చకుడు, విఐపీలకు రెండు ముక్కలు చెప్పే అవకాశం వస్తే, దానిని నిర్గుణోపాసన యొక్క ప్రాముఖ్యతను వారి దృష్టికి తీసుకు వెళ్ళటానికి ప్రయత్నించాలి. తిరుమల దర్శనాల సమయాలను, పూర్తిగా సామాన్యుల కొరకు కేటాయించాలి.

ఈనాటి పద్యం

మహాకవి బమ్మెర పోతనా మాత్యుడు. భాగవతం లోది. సీస పద్యం.
Kamaniiya bhuumi bhaagamulu leekunnavee ,
కమనీయ భూమి భాగములు లేకున్నవే
pad`i yund`ut`aku duudi parupuleela?
పడియుండుటకు దూది పరుపులేల?
Sahajambulagu karaanjalulu leekunnavee ,
సహజంబులగు కరాంజలులు లేకున్నవే,
bhoojana bhaajana punjameela?
భోజన భాజన పుంజమేల?
Valkalaajinakus`aaval`ulu leekunnavee,
వల్కలాజిన కుశావళులు లేకున్నవే,
kat`t`a dukuula sanghambu leela?
కట్ట దుకూల సంఘంబు లేల?
Konakoni vasiyimpa guhalu leekunnavee,
కొనకొని వసియింప గుహలు లేకున్నవే,
praasaada saudhaadi pat`ala meela?
ప్రాసాద సౌధాది పటలమేల?


తేటగీతి.
phala rasAdulu kuriyavE pAdapamulu?
ఫల రసాదులు కురియవే పాదపములు ?
Svaadu jalamula nund`avee sakala nadulu ?
స్వాదు జలముల నుండవే సకల నదులు?
Posaga bhikshamu vet`t`aree pun`ya satulu ?
పొసగ భిక్షము వెట్టరే పుణ్య సతులు?
Dhana madaandhula koluveela , taapasulaku ?
ధన మదాంధుల కొలువేల తాపసులకు?

257 Mr. Modi wants to take tough decisions to improve the financial health of this Nation!

257 Mr. Modi wants to take tough decisions to improve the financial health of this Nation!
257 ఈ దేశం యొక్క ఆర్ధిక ఆరోగ్యాన్ని మెరుగు పరచటానికి శ్రీమోడీ గారు కఠిన నిర్ణయాలు తీసుకుంటారట!!
చర్చనీయాంశాలు: నరేంద్రమోడీ, ఆర్ధికం, బిజెపి

---

భారత ఆర్ధిక వ్యవస్థను మెరుగు పరచటానికి ప్రధానమంత్రి శ్రీనరేంద్ర మోడీగారుకఠిన చర్యలు తీసుకుంటామన్నారు. శ్రీవారి మాటలలోనే చదవండి.

I have taken over the reins of this country in circumstances when there is nothing left behind by the previous Government. They left everything empty. The country's financial health has hit the bottom.

తెలుగు సారం: నేను ఈ దేశం యొక్క పగ్గాలను, పాత ప్రభుత్వం ఏమీ మిగల్చకుండా వదిలేసినపరిస్థితులలో స్వీకరించాను. వాళ్లు ప్రతిదానిని ఖాళీగా వదిలేశారు. దేశం యొక్క అర్ధిక ఆరోగ్యం పాతాళాన్ని తాకింది.

Taking tough decisions and strong measures in the coming one or two years are needed to bring financial discipline which will restore and boost the country's self-confidence.

దేశం యొక్క ఆత్మ విశ్వాసాన్ని పునరుధ్ధరించి, వృధ్ధి చేసేఆర్ధిక క్రమశిక్షణను తీసుకు రావటానికి , రాబోయే ఒకటి రెండేళ్ళలో, కఠిన నిర్ణయాలను మరియు బలమైన చర్యలను తీసుకోటం అవసరం.

వైబీరావు గాడిద వ్యాఖ్యలు

శ్రీవారు తన కఠిన చర్యలను ఎవరిపై తీసుకుంటారో తెలియదు. తనకు విరాళాలిచ్చిన పెద్ద పారిశ్రామిక వేత్తలపై తీసుకోగలరా? తీసుకోలేరు.

తన పార్టీకి వెన్నుదన్నుగా నిలిచే, దేశానికి కూడ వెన్ను దన్నుగా నిలిచే చిన్న, మధ్యతరహా పారిశ్రామిక వేత్తల విషయంలో ఆయన ఏమైనా కఠిన నిర్ణయాలను తీసుకుంటారా? దాని వల్ల లాభం కన్నా నష్టం ఎక్కువ జరుగుతుంది.

మధ్యతరగతి వారిని గిల్లితే, వారు ట్విట్టర్ లో తిట్టిపోస్తారు.

నిరుపేదల పై తీసుకుంటారా? మూలిగే నక్కలపై తాటిపండ్లు పడ్డట్లుగా అవుతుంది.

భారత ఆర్ధిక సమస్యలకు అత్యంత ప్రధాన కారణాలు, ఈగాడిద దృష్టిలో:

౧. అదుపులేని జనాభా. చైనాను దాటి వెళ్ళిపోతున్నాం. భారతీయుల పునరుత్పత్తి శక్తి ప్రపంచాన్నే నివ్వెర పోయేలా చేస్తుంది. కఠిన నిర్ణయం తీసుకోవాలంటే, నిరోధ్ లను, వాసెక్టమీలను, ట్యూబెక్టమీలను, ఇతర కుటుంబ నియంత్రణ పధ్ధతులను , మోడీ గారు తన ఎన్నికల ప్రచారాన్ని ఎంత అంకిత భావంతో చేసుకున్నారో, అంతే అంకిత భావంతో చేపట్టాలి.

౨. సూర్యశక్తిని, కెరటాల శక్తిని వాడకుండా, దిగుమతి చేసుకున్న క్రూడ్ పై , గ్యాస్ పై ఆధారపడటం. ఇంటింటికీ, సూర్యశక్తి దీపాలను, స్టవ్ లను, పంకాలను, ఉచితంగా ఇస్తారా?

౩. ప్రైవేటు వాడకానికి కార్ల ఉత్పత్తిని నిషేధిస్తారా? ఆడి, మెర్సిడెజ్, బిఎండబ్ల్యూ, స్కోడా, చెవర్లెట్, రోల్సరాయిస్ వంటి కార్ల తయారీని నిషేధిస్తారా?

౪. వైద్యశాలలు మొ|| అత్యవసర వాడకాలకు తప్ప ఇంటింటిలో వాడబడుతున్న ఏసీ లను నిషేధిస్తారా?

౫. టీవీల ద్వారా జరిగే విద్యుత్ ఖర్చును తగ్గించాలంటే, ఫుట్ బాల్, క్రికెట్ మొ|| కామెంటరీలను నిషేధించాల్సి వస్తుంది. నిషేధించ గలరా?

౬. విదేశీ టూరిస్టులకు తప్ప, మిగిలిన అనవసర ఖరీదైన హోటళ్ళను మూసేయ గలరా?

౭. భారతీయులు 90% మంది మూర్ఖులు అని ఒక విశ్రాంత సుప్రీం కోర్టు న్యాయమూర్తిగారు అని తరువాత విరమించుకున్నారు కానీ, భారతీయులు నిజంగానే బుధ్ధిహీనులు అనటంలో సందేహం లేదు. ఎలాగంటే, చైనా 36౦౦౦ చదరపు మైళ్ళ భారత భూభాగాన్ని 1962 లో ఆక్రమించుకున్నది. పరమాణు శక్తి కల దేశమైన, చైనాతో సాయుధ యుధ్ధం చేయటం కుదరదు అనే మాటనిజమే. భారతీయులు బుధ్ధిహీనులు ఎందుకంటే, అదే చైనానుండి ఏడాదికి 5౦బిలియన్ డాలర్లదాకా గుండుసూదినుండి సెల్ ఫోన్ ల వరకు కొంటూ, వారి ఆర్ధిక వ్యవస్థకు మూల స్థంభాల్లాగా, మహారాజ పోషకులు లాగా మారామంటే, మనం బుధ్ధిహీనులమా, బుధ్ధిమంతులమా? ఈ దురాక్రమణదారు అయిన చైనా దేశాన్ని, నరేంద్రమోడీగారు నాలుగు సార్లు సందర్శించి, వారిని ఏమి అడుక్కొని వచ్చారో మనకి తెలియదు. కఠిన నిర్ణయాలను తీసుకుంటానన్న శ్రీ నరేంద్రమోడీగారికి, చైనానుండి చేసుకునేదిగుమతులను, ఆదేశానికి చేసే ఎగుమతులను దాటకుండా (అంటే షుమారు 20 బిలియన్ డాలర్లుకు) అదుపుచేయగల ధైర్యం శ్రీమోడీగారికి ఉన్నదా?

౮. దేశంలో ప్రతిపట్టణంలోనూ, నగరంలోనూ, ఎందరో లంచావతార ప్రభుత్వోద్యోగులు, పారిశ్రామిక వేత్తలు, వ్యాపార వేత్తలు, భూస్వాములు, సినీతారలు, క్రికెటర్లు, విచ్చలవిడిగా భూములను, ఒక్కోళ్ళు పదేసి ప్లాట్లను కొని పారేశారు. కొందరికి వేలాది ఎకరాలు ఉన్నాయి. వాళ్ళు ఆ భూములను దున్నరు. ఇళ్ళు కట్టరు. అవి పడావ్ గా పడి ఉంటాయి. దీని వల్ల సాగుభూమికి కరువు ఏర్పడి వ్యవసాయ వృధ్ధిరేటు ఘోరంగా దెబ్బతిన్నది. శ్రీనరేంద్రమోడీ గారు, ఆ ప్లాట్లన్నిటినీ, పరిమితిని మించి పోగేసుకున్నవాటిని, ఏపరిహారం ఇవ్వకుండా స్వాధీనం చేసుకోగలరా? అలా స్వాధీనం చేసుకున్న సాగుకు అనుకూల భూములలో, ప్రభుత్వ స్వంత వ్యవసాయ క్షేత్రాలను నెలకొల్పి ఉపాధి చూపగలరా?

౯. బ్యాంకులనుండి అప్పులు తీసుకున్న బడా పారిశ్రామిక వేత్తలు, వ్యాపారవేత్తలు, నిధులను దారిమళ్ళించి రియల్ ఎస్టేట్లలో పెట్టుబడులు పెట్టారు. స్పెక్యులేషన్ లాభాలతో పోలిస్తే బ్యాంకు వడ్డీ చవుక, కిస్తులు తేలికగా ఉంటాయి కాబట్టి, వారు ఆ ఋణాలను కావాలనే కట్టక పోటమే కాక, కొన్ని విదేశాల్లో ఉన్న మాంద్యాన్ని ఒకకారణంగా చూపించి కొత్త ఋణాలు అడుగుతున్నారు. వడ్డీలు తగ్గించమని అడుగుతున్నారు. శ్రీమోడీకి ధైర్యం ఉంటే, ప్రతి బ్యాంకు (ప్రైవేటు మరియు ప్రభుత్వ తేడా లేకుండా) ఇచ్చిన పెద్ద ఋణాలను లోతుగా ఆడిట్ చేయించి, దారి మళ్ళించిన ఋణాలను వసూలు చేయగలరా?

౧౦. బాలీవుడ్, టాలీవుడ్, కాలీవుడ్, ఇలా రకరకాల పేర్లతో పిలువ బడుతున్న భారతీయ సినిమా రంగంలో కొన్ని వేలకోట్ల నల్ల డబ్బు, నేరగ్రస్త డబ్బు, చలామణీ అవుతున్నది. మాఫియా డాన్ లు ఋణదాతలుగా, చలామణీ అవుతున్నారు. సినిమారంగంలోకి కుప్పలుగా వచ్చి పడుతున్న నేరగ్రస్త డబ్బును, శ్రీమోడీ ఏవిధంగా స్వాధీనం చేసుకుంటారు, అనేదానిని వెండి తెరపై చూడాలి.

౧౧. కాదేదీ కవిత కనర్హం అని స్వర్గీయ శ్రీశ్రీ అన్నారు కానీ, కాదేదీ జూదాని కనర్హం అని ఆయన అని ఉండాల్సింది. ఎందుకంటే, ఈదేశంలో, క్రికెట్, ఫుట్ బాల్, ఐపీఎల్, మొ|| నానావిధ క్రీడలలోకి, ఎన్నికలు, కోడిపందాలు, వానలు, స్టాక్ మార్కెట్ లు, ప్రతిదానిలోకీ జూదం చొరబడింది. వీటిల్లో ఏజూదాన్ని శ్రీనరేంద్రమోడీగారు ఆపించగలరు?

మోడీగారి మాటలను బట్టి చూస్తుంటే, వారు పాశ్చాత్య రేటింగు సంస్థల తృప్తి కొరకు, భారత ప్రజలను పన్నులతో బాదుతారా, అనే అనుమానం కలుగుతుంది!!

ఇంకా ఉంది.