245 Enflaming land speculation in Vijayawada-Mangalagiri-Guntur Area

245 విజయవాడ , గుంటూరు, మంగళగిరి ఏరియాలో భూ స్పెక్యులేషన్ మంటలు రేపుతున్నా నాయుడు ద్వయం

చర్చనీయాంశాలు: విజయవాడ, గుంటూరు, మంగళగిరి, నాగార్జున యూనివర్సిటీ, రాజధాని, సూర్యశక్తి, కెరటాలశక్తి, desalienation

---

తెలంగాణను బుజ్జగించే పని, కెసిఆర్ ను అదుపులో పెట్టేపని శ్రీ వెంకయ్యనాయుడు , కేంద్ర హోం మంత్రి శ్రీ రాజ్ నాధ్ సింగుకు వదిలేస్తే బాగుంటుంది. కారణం: శ్రీ వెంకయ్యనాయుడుని తెలంగాణ ప్రజలు, నేతలు, సీమాంధ్ర నేతగా పరిగణిస్తున్నారు. కనుక శ్రీ వెంకయ్య సత్యం చెప్పినా, అసత్యం చెప్పినా, తెలంగాణలో నిరసనలు రేగే అవకాశం ఉంది.
నాయుడు ద్వయం (శ్రీవెంకయ్యనాయుడు, శ్రీ చంద్రబాబు నాయుడు), వీళ్ళకి విగుంతె మంగళగిరి ప్రాంతంలో ఏమైనా బినామీ భూములు ఉన్నాయో ఏమో మనకు తెలియదు కానీ, విగుంతె ప్రాంతంలో పేట్రేగిన భూముల స్పెక్యులేషన్ లో అగ్నికి ఆజ్యం పోస్తున్నారు. విశాఖ నుండి తిరుపతి వరకు జరుగుతున్న ఇళ్ళ స్థలాల స్పెక్యులేషన్లో సీమాంధ్ర భూకులాలు రెండు మూడే ముందంజలో ఉండటం గమనార్హం. మిగిలిన కులాల వారు సేల్స్ ఉద్యోగులుగానో, బ్రోకర్లుగానో నాలుగు రాళ్ళకోసం ఆశ పడుతున్నారు తప్ప వందలాది ఎకరాలు కొనే స్థితిలో లేరు. నాయుడు ద్వయం వారి సామాజిక వర్గం వారు ఈవిషయంలో అతి ముందంజలో ఉండటం గమనార్హం. వారు చేసే ప్రకటనలు పేదతరగతుల వారికి వంద గజాల స్థలాలకు కూడ నోచుకోకుండా చేస్తాయి.

కడపలో ఇప్పటికే రియల్ ఎస్టేట్ బుడగ పేలిపోయిందని తెలుగు అగ్రశ్రేణి పత్రిక వ్రాసింది. ఇంకా ఏ పట్టణంలో ఎంతమందికి గుండెలు పగిలి పోవాలో కొత్తరాజధాని ప్రకటన వస్తేగానీ తెలీదు. మొత్తం ౩0 దాకా పట్టణాలలో నగరాలలో స్పెక్యులేషన్ జరిగింది అనుకుంటే, కనీసం 25 పట్టణాలలో, నగరాలలో రియల్ ఎస్టేట్ వ్యాపారులు, స్థలాలు కొన్నవాళ్ళ గుండెలు పగలటం అలా ఉంచి, రాష్ట్రంలో బీడుగా పడిఉండే స్థలాలు కొన్ని లక్షల ఎకరాలకు చేరుకునే అవకాశం ఉంది. ఇది వ్యవసాయాన్ని తీవ్రంగా దెబ్బతీస్తుంది. కనీసం పాలకూర మడో, దొండ పాదులో వేసే అవకాశాన్ని కూడ కోల్పోతాయి.

సీమాంధ్రను మూడు రాష్ట్రాలు చేయాలనే నా అభిప్రాయంలో మార్పులేదు. అపుడే మూడు రాజధానులు వస్తాయి. స్పెక్యులేషన్ వికేంద్రీకరణ జరుగుతుంది. రవాణా ఖర్చులు తగ్గుతాయి. ఇపుడు ఎవరు బాగు పడుతున్నారు? టోల్ గేట్ల వాళ్ళు , ప్రైవేటు బస్సుల వాళ్ళు.

మన వెన్నుపోటు సార్వభౌమ ముఖ్యమంత్రిగారు, విజయవాడ ఎంపీ, అనంతపురం ఎంపీ (వీరిద్దరు, వీరి బంధువులు, పెద్ద ప్రైవేటు ట్రాన్స్పోర్టర్లు) కొరకు ఆర్టీసీని బలి చేసే అవకాశం ఉంది. మూడు రాష్ట్రాలు ఏర్పడితే జాతీయ రహదారులు, రైలు మార్గాలపై వత్తిడి తగ్గి, ప్రజలు తమతమ పనులపై దృష్టి పెట్టుకునే అవకాశం కలుగుతుంది. మెట్రోకు పెట్టే పెట్టుబడితో కొన్ని వేల ఎకరాలలో వ్యవసాయాన్ని, పశుపోషణను పునరుధ్ధరించుకో వచ్చు.

లీటరు మంచి నీళ్ళ ఉత్పత్తి ఖర్చు కేవలం అయిదు పైసలే!!!!!!

మనం దృష్టి పెట్టాల్సింది మెట్రో పై కాదు. సూర్య శక్తి, సముద్రజలాల శుధ్ధి, కెరటాలలోంచి విద్యుత్ ఉత్పత్తి, శుధ్ధిచేసిన తీయని సముద్రపు నీటిని ఎగువకు పంపు చేయటం. దీనిని మనం ఏస్థాయికి తీసుకు వెళ్ళాలంటే, తెలంగాణవారికి కూడ మనం శుధ్ధి చేసిన సముద్రం నీటిని ఎగువకి పంపింగు చేయకలగాలి. దీనిని పగటి కలగా భావించ కూడదు. లీటరు మంచి నీళ్ళ ఉత్పత్తి ఖర్చు కేవలం అయిదు పైసలే!!!!!! కుడాంకులం అణు విద్యుత్ కేంద్రం వారు సముద్రపు నీటిని చవకగా శుధ్ధిచేసే, విద్యుత్ ఉత్పత్తి చేసే సాంకేతికను కనుక్కున్నారు. వారిని సంప్రదించి మనం ముందడుగు వేయాలి.

ఇలాంటి పనులకి వెంకయ్యలు, చంద్రబాబులు, జగన్ లు పనికి రారు. కానీ ఏం చేస్తాం, ఇపుడు మనకి ఉన్నది వారే కదా.

ఈనాటి తెలుగు చలన చిత్ర గీత శకలం

చిత్రం వెలుగునీడలు.
రచన మహాకవి శ్రీశ్రీ.
గానం ఘంటసాల. అగాధమౌ జలనిధిలోనా ఆణిముత్యమున్నటులే
శోకాల మరుగున దాగి సుఖమున్నదిలే

ఏదీ తనంత తానై.. నీ దరికి రాదు
శోధించి సాధించాలి.. అదియే ధీరగుణం
కలకానిది.. విలువైనది..
బ్రతుకు.. కన్నీటి ధారలలోనే బలి చేయకు

వ్రాయాల్సింది ఇంకా ఉన్నది. సరిదిద్ద వలసినది కూడ ఉన్నది.

244 Undue Strain on A.P. Police

244 Undue Strain on A.P. Police
244 నాయకుల నోటి దురద, గ్రాండియోస్ దురద యేమో కాని పోలీసులు, ప్రజలు చచ్చిపోతున్నారు
చర్చనీయాంశాలు: పోలీసువ్యవస్థ, ప్రజాస్వామ్యం, టిడిపి, చంద్రబాబు, వెంకయ్యనాయుడు

పిల్లికి చెలగాటం, ఎలుకకు ప్రాణ సంకటం అన్నట్లుగా నాయకుల నోటి దురద, గ్రాండియోస్ దురద, తయారయింది. గండిపేట మహానాడు ముగిసింది. మహానేత చంద్రబాబు గారి నోటి దురద కొంతమేరకు తీరింది. విరాళాలూ భారీగానే సమకూరాయి. ధర్మరాజుగారి మయసభలాగా గ్రాండియోస్ కోరిక కూడ తీరింది.

కానీ కోరికలు అగ్ని శిఖలలాంటివి. మనం నెయ్యి పోస్తున్నకొద్దీ అవి విజృంభిస్తాయి. చివరికి అవి మనల్నే కబళించినా ఆశ్చర్యపోనవసరంలేదు.

ఇపుడు చంద్రబాబుగారి కోరిక ఏమిటంటే తన సామంతరాజ్య పట్టాభిషేక మహోత్సవం అంగరంగ వైభవంగా జరగాలి. దానికి మోడీ చక్రవర్తి హాజరు కావాలి. పాలెగాళ్ళు, పరివార జనం కైవారాలు చేయాలి.

నాగార్జున విశ్వవిద్యాలయం ఎదురు స్థలంలో జూన్ 8 వ తారీకున తలపెట్టిన ఐదు లక్షల జనాన్ని పోగు చేస్తున్న పట్టాభిషేక మహోత్సవం కూడ ఈతరగతికి చెందినదే. అసలే కోతి, కల్లు తాగింది. నిప్పు తొక్కింది, అన్నట్లుగా చంద్రయ్యగారికి వెంకయ్య కూడా తోడయ్యాడు. ఇంక రాజు తలుచుకుంటేదెబ్బలకు కొదువనా అన్నట్లుగా పోలీసులు, కలెక్టర్లు, ఎస్ పీలు, ఏర్పాట్లు చేయలేక చస్తున్నారు. పాపం, ఈమధ్యనే నిద్రాహారాలు మానేసి ఎన్నికలను పూర్తిచేసి మన ప్రజాస్వామ్యరథాన్ని బాగానే ముందుకు తోసారు. ఇపుడు మరల ఎండలో చావాల్సి వస్తున్నది.

ఇపుడు పులి మీద పుట్రలా రాలీలు, సభలు. కుక్కలను తీసుకువెళ్ళి నేలను వాసన చూపించటం. గ్రౌండు చదును చేయించటం. చలువ పందిళ్ళు వేయించటం. శ్రీరామ పట్టాభిషేకం కోసం నాటి అయోధ్య పౌరులు, దశరధుడి మంత్రులు చేసిన హడావిడి కన్నా ఎక్కువగా ఉన్నది. దీనంతటికి కనీసం ఒక రెండు కోట్లు ఖర్చయినా ఆశ్చర్యపోనక్కరలేదు.

చివరికి నాయకుడు గారు ఏమి చెప్తాడు? వడ్లగింజలో బియ్యపు గింజ. విగుంతే ని సింగపూరు చేస్తాం. మెట్రోరైలు మీ ఇంటి ముందుకే వస్తుంది.

ఈలోగా విగుంతే రియల్ ఎస్టేట్ వ్యాపారులు ఇదిగో పులి అంటే అదిగో తోకలాగా విగుంతే భూములను కొని పారేస్తున్నారు, అమ్మి పారేస్తున్నారు.

నాయకులు గారు తాము చెప్పదలుచుకున్న దానిని, ఒక ఏ 5 కాగితం పై అచ్చు వేయించి, పాల ప్యాకెట్ లను అందులో ర్యాప్ చేయిస్తే , వారు అందించ దలుచుకున్న సందేశం ప్రజలకు చేరుతుంది. కాక పోతే, ప్రజలలో పోయిన చదవటం అనే అలవాటును పునరుధ్ధరించటం ఎలా అనేదే కీలక ప్రశ్న అవుతుంది.

వాల్మీకి రామాయణం, అయోధ్యాకాండ, మూడవ సర్గ, శ్రీరామ పట్టాభిషేకానికి సన్నాహాలు

suvarNaadiini ratnaani baliin sarvaushhadhiirapi || 2-3-8
సువర్ణాదీనీ రత్నాని బలీన్ సర్వౌషధిరపి
పూజకోసం బంగారం మొ|| తెండి. హోమానికి ఓషధులను తెండి.

shuklamaalyaaMshcha laajaaMshcha pR^ithakcha madhusarpishhii |
శుక్లమాల్యాంశ్చా లాజాశ్చ పృథక్చ మధు సర్పిషిః
తెల్లటి పూలమాలలను తెండి. ధాన్యం (మరమరాలు మొ||) తెండి. తేనె నేయి విడిగా తెండి.

ahataani cha vaasaaMsi rathaM sarvaayudhaanyapi || 2-3-9
అహతాని చ వాసాంసి రథం సర్వాయుధాన్యపి
కొత్త బట్టలు, రథం, ఆయుధాలు తెండి.

chaturangabalaM chaiva gajaM cha shubhalakshaNam |
చతురంగ బలం చైవ గజం చ శుభలక్షణం
రధ గజ తురగ పదాతులు అనే చతురంగ బలాన్ని తెండి. మంచి శుభ లక్షణాలున్న ఏనుగును తెండి.

chaamaravyajane shvete dhvajaM chhatraM cha paaNDuram || 2-3-10
చామర వ్యజనే శ్వేతే ధ్వజం ఛత్రం చ పాండురం
విసనకర్రలు (చామరం అనే జంతువు జుట్టునుండి చేసినవి, రవివర్మ రామపట్టాభిషేకం చిత్రం చూడండి) , తెల్ల గొడుగులు తెండి.

shataM cha shaatakumbhaanaaM kumbhaanaam agnivarchasaam |
శతం చ శాతకుంభానాం కుంభానాం అగ్ని వర్చశామ్
ఒక వంద అగ్నిలాగ మెరిసే బంగారు (గోల్డెన్) కుండలు తెండి.

hiraNyashR^iN^gamR^ishhabhaM samagraM vyaaghracharma cha || 2-3-11
హిరణ్యశృంగమృ షాభం సమగ్రం వ్యాఘ్రచర్మ చ
బంగారు కొమ్ములున్న ఎద్దును తెండి. పులి చర్మం తెండి.

upasthaapayata praatar agnyagaaraM mahiipateH.
ఉపస్థాపయత ప్రాతర్ అగ్న్యాగారం మహీపతే.
అన్నీ తెచ్చి రాజుగారి అగ్ని ఆగారం (హోమ శాల) లో పెట్టండి.

yachchaanyatkiJNchideshhTavyaM tatsarvamupakalpyataam | 2-3-12
యఛ్ఛాన్యత్ కించిత్ ఏష్టవ్యం తత్ సర్వం ఉపకల్ప్యతాం
ఇంకా ఏమన్నా కావాల్సి వస్తే అన్నీ సమకూర్చండి.

antaHpurasya dvaaraaNi sarvasya nagarasya cha
అంతః పురస్య ద్వారాని సర్వస్య నగరస్య చ
నగరంలో అన్ని ద్వారాలను, అంతఃపుర ద్వారాలను అన్నిటిని

chandanasragbhirarchyantaaM dhuupaishcha ghraaNahaaribhiH || 2-3-13
చందన స్రగ్భిరర్చ్యంతామ్ ధూపైశ్చ ఘ్రాణహారిభిః
చందనం పొడి పూసి , పూలమాలలతో అలంకరించి ధూపం వేయండి.

prashastamannaM guNavad dadhi kshiiropa sechanam |
ప్రశస్తం అన్నం గుణవద్ దధి క్షీరోప సేచనం
మంచి అన్నం, పెరుగు పాలతో చిలకరించినది సేకరించండి.

dvijaanaaM shatasaahasre yatprakaamamalaM bhavet || 2-3-14
ఒక లక్ష మంది బ్రాహ్మణులకు సరిపోయేలా ఏర్పాటు చేయండి.

satkR^itya dvijamukhyaanaaM shvaH prabhaate pradiiyataam |
సత్ కృత్య ద్విజ ముఖ్యానాం శ్వః ప్రభాతే ప్రదీయతాం
బ్రాహ్మణ ముఖ్యులను సత్కరించి రేపు ప్రొద్దున పెట్టండి.

ghR^itaM dadhi cha laajaashcha dakshiNaashchaapi pushhkalaaH || 2-3-15
ఘృతం దధి చ లాజశ్చ దక్షిణాశ్చాపి పుష్కలః.
నెయ్యి, పెరుగు, మరమరాలు, పేలాలు, పుష్కలమైన దక్షిణ ఇవ్వండి.

suurye.abhyuditamaatre shvo bhavitaa svastivaachanam |
సూ

braahmaNaashcha nimantryantaaM kalpyantaamaasanaani cha || 2-3-16
బ్రాహ్మణాశ్చ నిమంత్ర్యంతాం కల్ప్యంతాం ఆసనాని చ
బ్రాహ్మణులను ఆహ్వానించండి. ఆసనాలను కల్పించండి.

diirghaasibaddhaa yodhaashcha sannaddhaa mR^ishhTavaasasaH || 2-3-19
దీర్ఘాసిబధ్ధా యోధాశ్చ సన్నధ్ధ మృష్టవాససః
పెద్ద పెద్ద కత్తులు ధరించిన యోధులను (ఆధునిక కాలంలో ఏకే ఫార్టీ సెవెన్ గన్స్ లాగా) చక్కగా ఉతికిన బట్టలు ధరించిన వాళ్ళని (ఆధునిక కాలంలో బాగా గంజి పెట్టి ఇస్త్రీ చేసిన డ్రెస్ ధరించిన పోలీసులని)

mahaaraajaaN^gaNaM sarve pravishantu mahodayam |
మహారాజాంగణం సర్వే ప్రవిశంతు మహోదయం
యోధులని అందరిని మహారాజు గారి అంగణంలో ఉదయాన్నే నిల్చోమనండి. (రాష్ట్రపతి భవనం ముందు భాగం ఆవరణంలో ఇటీవల జరిగిన మోడీ పట్టాభిషేకోత్సవాన్ని గుర్తుకు తెచ్చుకోండి). జూన్ ఎనిమిదో తారీకు నాగార్జున విశ్వవిద్యాలయం ఎదురుగా జరిగి హెలీపాడ్ లో జరిగే జాతరలో ఇలాగే నిల్చోవాలి.

పోలీసు ఐజీలకు,డీఐజీలకు, ఎస్పీలకు, డీఎస్పీలకు, సీఐలకు, ఎస్ ఐలకు, ఎఎస్ఐలకు, హెడ్ కాన్స్టెబుల్స్ కి, కాన్ స్టేబుల్స్ కి , హోమ్ గార్డులకి, గుంటలు తవ్వేవాళ్లకి, గుంటలుపూడ్చే వాళ్ళకి, ఇతర సేవకగణాలకు నాహృదయ పూర్వక సానుభూతి.

చరిత్ర పునరావృత్తం కాదని ఎవరన్నారు? భారత దేశంలో పటాటోపం అంతరించి పోతుందని పగటి కలలు కనకండి, తెలుగు వాళ్ళల్లారా.

243 For as little as 1826 days reign why so much hullabaloo?

243. 1826 రోజుల ముచ్చటకు ఎందుకంత ఎగిరి పడటం?
చర్చనీయాంశాలు: నరేంద్రమోడీ, అద్వానీ, జోషీ, నవాజ్ షరీఫ్, పాకిస్థాన్, మహాభారతం, మీడియా, అరుణ్ జైట్లీ, తిక్కన, ఘంటసాల, నర్తనశాల

1826 రోజులంటారేమిటి? మోడీగారి బాద్షా గిరీ శాశ్వతం కాదా?

సాధారణ పరిస్థితులలో ప్రధానమంత్రుల పదవీకాలం ఐదేళ్ళు. అంటే 365 x 5 = 1825 + leap year 1 day = 1826 రోజులు.

ప్రశ్న: శ్రీమోడీగారు గుజరాత్ ను మూడు ఎన్నికల సీజన్లనుండి అంటే షుమారుగా 15 ఏళ్ళనుండి పరిపాలిస్తున్నారు, అలాగే భారత్ ను కూడ 2029 వరకు పాలించవచ్చు కదా.

జవాబు: నిజమే.

ఈవ్యాసాన్ని ప్రారంభించటానికి మంచి నర్తనశాల సినిమా పద్యాన్ని ఎన్నుకుంటున్నాను. ముందుగా స్పష్టీకరణ, మరియు ప్రార్ధన, ఎవరినీ గాయపరచటం ఈ వ్యాసకర్త ఉద్దేశ్యం కాదు. నాగాడిద బుధ్ధికి తోచింది వ్రాస్తున్నాను. వీలైనంత వరకు చట్టాన్ని అతిక్రమించకుండానే వ్రాస్తున్నాను. ఎవరి మనసుకైనా బాధ కలిగితే , క్రింద కామెంట్లలో వ్రాయమని ప్రార్ధిస్తున్నాను.

మహా భారతం. విరాట పర్వం. తిక్కన రచన. నర్తనశాల సినిమాలో ఘంటసాల కల్యాణిలో పాడారు. ఈ పద్యసారం ఏమిటంటే, ధర్మరాజు గొప్పదనాన్ని ఉగ్గడించటం.

26 మే నాడు నరేంద్రమోడీ తన ప్రధానమంత్రి ప్రమాణ స్వీకారోత్సవాన్ని భూదేవంత అరుగులతో, ఆకాశమంత పందిళ్ళతో జరుపుకున్నారు. భారత్ లోప్రధాని అనే వాడు సాంకేతికంగా అమాత్యుడే అయినా చక్రవర్తిలాగా , ఖలీఫాలాగా, సుల్తాన్ లాగా ప్రవర్తిస్తాడు. ప్రధాన మంత్రి కొడుకులు యువరాజుల్లాగా (నరేంద్రమోడీ గారి మాటలలో షాజాదా ప్రిన్స్), కూతుళ్ళు యువరాణిల్లాగా, అల్లుళ్ళు జాతికే జామాతల్లాగా ప్రవర్తిస్తారు. ధర్మరాజుగారి పట్టాభిషేకాలకు, రాజసూయాలకు, అశ్వమేథాలకు, స్వతంత్ర దేశాధీశులెవరైనా హాజరయ్యేవారేమో తెలియదు, ఎందుకంటే, తిక్కన గానీ, వ్యాసుడు గానీ, నన్నయ, ఎర్రనలు కానీ, స్వతంత్ర దేశాధీశుల ప్రసక్తి తేలేదు. నరేంద్రమోడీగారి విషయంలో నేపాల్, ఆఫ్ఘనిస్థాన్, పాకిస్థాన్, బంగ్లాదేశ్, శ్రీలంక, మాల్ దీవులు, మారిషస్ వంటి సార్కు దేశాల (భారతదేశం చుట్టూ దండలో పూలల్లాగా ఆవరించి యుండే దక్షిణ ఆసియా దేశాధిపతులు) అధిపతులను ఆహ్వానించారు. వీరంతా స్వతంత్ర దేశాధీశులే. సామంతులు కాదు.

రాష్ట్రాల ముఖ్యమంత్రులను సామంతులు అనాలా, లేక ఏమనాలి? జయలలిత, మమతా బెనర్జీ, మూలాయం సింగ్ యాదవ్, పట్నాయక్, వంటి వారిని సామంతులు అంటే ఊరుకోరు. శివరాజ్ సింగు చౌహాన్, వసుంధరా రాజే వంటి వారు నరేంద్రమోడీ వద్ద సామంతత్వాన్ని ఏదో అవసరం కొద్ది ఒప్పుకుంటున్నారే కానీ, అవకాశం దొరికినపుడు సమయం చూసుకుని తిరుగుబాటు చేయకమానరు.

సీసం. ఎవ్వని వాకిట నిభమద పంకంబు
రాజభూషణ రజో రాజి నడఁగు
ఎవ్వని చారిత్ర మెల్ల లోకములకు
నొజ్జయై వినయంబు నొరపు గఱపు
నెవ్వని కడకంటి నివ్వటిల్లెడు చూడ్కి
మానిత సంపద లీనుచుండు
నెవ్వని గుణలత లేడు వారాసుల
కడపటి కొండపైఁ గలయ బ్రాఁకు

తే. నతడు భూరిప్రతాప, మహా ప్రదీప
దూర విఘటిత గర్వాంధకార వైరి
వీర కోటీర మణి ఘృణి వేష్టితాంఘ్రి
తలుఁడు కేవల మర్త్యుఁడే ధర్మసుతుడు.

మొదటిపాదం. ధర్మరాజుగారికి ఏనుగుల మంద ఉంది. వాటి కుంభస్థలాల్లోంచి మదం అనే ఒక స్రావం ఊరుతూ ఉంటుంది. ఆకారిన మదం, జమ అయ్యి, ధర్మరాజుగారి కోట గుమ్మంలో బురద తయారయిందిట. ధర్మరాజు గారిని దర్శించుకోటానికి వచ్చిన సామంతరాజుల రష్ ఎక్కువైపోయి, వారి ఒంటిపై ఉన్న నగల్లో పొదిగిన వజ్రాలూ, రత్నాలూ , పొడి అయ్యి కింద ఉన్న బురదలో పడి పేస్టు అయ్యి ఆబురదను పూడుస్తున్నదిట.

మోడీగారిని దర్శించుకోటానికి వచ్చిన సామంతులకి ఆడి, బిఎమ్ డబ్ల్యూ , రోల్స్ రాయిస్, జగ్వార్ వంటి కార్లు ఉంటాయి. ఈకార్లు ఒకదానికొకటి రాసుకుంటే రాలేది రంగు. వసుంధరారాజే వంటి వాళ్ళు వజ్రాలను ధరించినా, పొడి నేలమీద రాలేంత షో లేదు. మన పాలకుల దగ్గర భారీగా బంగారం ఉంటుందనేది అందరికి తెలుసు. మన కొత్త ఆర్ధిక మంత్రి శ్రీ అరుణ్ జైట్లీగారి దగ్గర ఉన్న బంగారం, వెండి, వజ్రాల గూర్చి తెలుసుకోవాలంటే, పోస్టు నంబరు చూడండి.

పోర్ష్ కారు రూ. 1.02 crore.
మెర్సిడెజ్ బెంజి కారు రూ. 78.89 లక్షలు.
బిఎమ్ డబ్ల్యూ కారు రూ.85.57 లక్షలు.
హోండా ఎకార్డు కారు రూ.20.44 లక్షలు.
టొయోటా ఫార్ట్యూనర్ కారు రూ.23.28 లక్షలు.
బంగారం: రూ. 1.88 కోట్లు. 5.630 కిలోల బంగారం.
15 కిలోల వెండి, వజ్రాలు.

అవన్నీ ధరించుకొని రారనుకోండి. అవన్నీ ధరించుకొని వస్తే ఒకళ్ళనగలు మరొకళ్ళకి రాచుకొని పొడి నేల మీది రాలి, బురదను పూడ్చిందా లేదా అనే ప్రశ్న ఆవిర్భవిస్తుంది.

రెండో పాదంలో, ఒజ్జ అంటే ఉపాధ్యాయుడు. ధర్మరాజుగారి చరిత్రం ఉపాధ్యాయుడిలాగా మారి అన్నిలోకాలకి వినయం ఎలా ఉండాలో నేర్పుతుందట. నరేంద్రమోడీగారి చరిత్రాన్ని మీడియా భజన చేయటం ఈమధ్యనే మొదలు పెట్టింది. మనందరం వినయం నేర్చుకోటానికి, శ్రీ ప్రధానమంత్రిగారి చరిత్రను చదవాల్సిందే. పిల్లలకు వినయం సరిగా అబ్బుతుందో, అబ్బదేమో అని, మధ్యప్రదేశ్ ముఖ్యమంత్రి శ్రీ శివరాజ్ సింగ్ చౌహాన్ గారు, పాఠశాలల్లో మోడీ చరిత్రను చదివించటానికి రెడీ అవుతున్నారు.

ఇపుడు మూడో పాదంలోకి రండి. ధర్మరాజుగారి కడకంటి చూపు యొక్క కిరణం మనమీద పడితే చాలు మనకు సకల సంపదలు సమకూరుతాయి. నరేంద్రమోడీ రాజు గారి కడకంటి చూపు కిరణాలు పడి సకల సంపదలు సమకూర్చుకున్న పారిశ్రామికి వేత్తలు ఇప్పటికే ఉన్నారు. అయ్యగారి కడకంటి చూపు కోసం, అంబానీ, అదానీ, వంటి భారతీయ పారిశ్రామిక వేత్తలే కాక, విదేశీ పెట్టుబడిదారులు జయహే, జయహే అంటూ భారత్ లోకి నగదుని కుమ్ముతున్నారు.

నాలుగో పాదం లోకి రండి. ధర్మరాజు గారి సుగుణాల తీగెలు (క్రీపర్స్) సప్త సముద్రాలకవతల ఉన్న కొండల మీదికి పాకుతున్నాయిట. నరేంద్రమోడీ గారి సుగుణాల లతాగుల్మాలు ఎక్కడికి పాకుతాయి. సప్తసముద్రాల అవతల అంటే రష్యానా, అమెరికానా, ఇంగ్లండా, ఫ్రాన్సా?
ఇపుడు చివరలో ఈసీసానికి అనుబంధంగా ఉన్న తేటగీతికి వద్దాం. ధర్మరాజుగారిచేత ఓడించబడిన శత్రురాజులు ఆయన పాదాలకు మొక్కటం ఆకాలంలో పరిపాటి. ఘృణి అంటే కిరణాలు. ఆయన పాదాలకు మ్రొక్కేటపుడు శత్రురాజుల తలల కిరీటాలపై ఉండే మణులు తమ ఘృణులను అంటే కిరణాలను ఆయన పాదాలపై ప్రసరించినపుడు, ప్రకాశిస్తున్న పాదాలు కలవాడు. ధర్మరాజు ప్రతాపం వెలుగులో శత్రురాజుల గర్వం అనే చీకట్లు పటాపంచలై పోయాయిట. నరేంద్రమోడీ గారి ప్రతాపం వెలుగులో సోనియా, రాహుల్ లా గర్వాంధకారాలు పటాపంచలైపోయాయా? అరవింద్ కేజ్రీవాల్ తరువాత మోడీగారిని సందర్శించి అయనకు కాల్ మొక్కుతాడా మొక్కడా? చంద్రబాబు నాయుడు, జగన్ లు ఇప్పటికే వెళ్ళి కాల్ మొక్కి వచ్చారే.

ఇంకా వ్రాయాల్సింది వంద పేజీలు ఉంది.