237 How to help tenant farmers?

237 కౌలు రైతులను ఎలా ఆదుకోటం?
చర్చనీయాంశాలు: వ్యవసాయం, కౌలు రైతులు, బ్యాంకు ఋణాలు, చంద్రబాబు, Chandra Babu Naidu, tenant farmers

---

రాత్రంతా టపాసుల మోత మార్మోగి పోయింది. పటాఖాలకే రెండు లక్షలు ఖర్చయి ఉంటాయి. ప్రజలకు సేవ చేసే అవకాశం లభించినందుకే ఇన్ని బాంబులు కాల్చాలా? సరే, చంద్రబాబు నాయుడిగారిని ఆనందోత్సవాలు చేసుకోనిద్దాము. ఒక నియోజక వర్గానికే రెండు లక్షలు ఖర్చయితే ఆంధ్ర ప్రదేశ్ మొత్తానికి ఎంత ఖర్చై ఉండాలి.



ఆయన వీలైనంత తొందరగా, శ్రీ నరేంద్ర మోడీ గారి కాళ్ళు పట్టుకొని రైతులకి తాను వాగ్దానం చేసిన ఋణాల మాఫీ పథకాన్ని కేంద్ర ప్రభుత్వ ఆర్ధిక శాఖ చేత, కేంద్ర ప్రభుత్వ బ్యాంకుల చేత, అమలు చేయిస్తాడని ఆశిద్దాము. ఇది స్వంత పొలాలున్న రైతులకు బాగానే ఉంటుంది. భూములను అనధికారిక కౌలుకిచ్చి, తమ పేర్లతో బ్యాంకు లోన్లు తీసుకున్న వాళ్ళకి గాలి వాటం లాభాలు కూడ వస్తాయి. సరే, అది అట్లుండనిండు.

మరి మౌఖిక కౌలుదారీ రైతుల సంగతి ఏమిటి?

ఖరీఫ్ వానలు దగ్గర పడుతున్నాయి. విత్తనాలు కొనుక్కోవాలి. ఎరువులు సిధ్ధం చేసుకోవాలి. ట్రాక్టర్లకు కిరాయిలు ఇచ్చుకోవాలి. మౌఖిక కౌలు రైతులకు బ్యాంకు ఋణాలు ఆంధ్రప్రదేశ్ లో లభించవు అనేది అందరికీ తెలిసిన విషయమే.

తీసుకోవాల్సిన చర్యలు

ప్రభుత్వం తక్షణమే, వీఆర్ వో లను రంగంలోకి దించి ప్రతి గ్రామంలోని యాబ్ సెంటీ లాండ్ లార్డుల పట్టిక తయారు చేయించాలి. ముఖ్యంగా స్వయంగా పొలందున్నించి సాగుచేయించే అవకాశాలు లేని వారిని అంటే వేరే ప్రాంతాలలో పని చేస్తున్న ప్రభుత్వోద్యోగులను, బిజీ డాక్టర్లను, బడా పారిశ్రామిక వేత్తలను, పెద్ద వ్యాపారులను గుర్తించి వారి భూములను నోటీఫికేషన్లు జారీ చేయించి కౌలుకు తీసుకోవాలి. వాటిని గ్రామంలో మౌఖిక కౌలు చేసుకుంటున్నవారికి లాటరీ ద్వారా న్యాయమైన కౌలుకు రెండేళ్ళ కాలానికి కేటాయించాలి.

బ్యాంకులకి, ప్రభుత్వమే హామీ ఇచ్చి వారికి రెండేళ్ళ కాలానికి ఒకే సారి వ్యవసాయ ఋణ పరిమితిని ఇప్పించాలి. పంటకోతల సమయంలో వీ ఆర్ వో ల చేత, వ్యవసాయ అధికారుల చేత , మార్కెట్ యార్డ్ అధికారుల చేత పర్యవేక్షణ చేయించి పంటను బస్తాలు, బోరాలు గా కట్టించి గోడౌన్ లలో స్టోర్ చేయించాలి.

వాటిని మంచి రేటు ఉన్న సమయంలో వేలం వేయించి, వచ్చిన డబ్బులలో తన సేవా ఛార్జీలను మినహాయించుకొని మిగిలింది బ్యాంకులోనుకు, రైతు ఖాతాకు, భూమి యజమాని ఖాతాకు, కరువు|వరదలు|తెగుళ్ళు మొ|| పరిస్థితులను బట్టి దామాషా పధ్ధతిలో జమ చేయించాలి.

రెండవ సంవత్సరాంతానికి కాంట్రాక్టును పూర్తి చేసి, కొత్త కాంట్రాక్టులకు తెర లేపాలి.

236 What is there to inquire about election results?

236 What is there to inquire about election results?
236 ఎన్నికల ఫలితాల గురించి అంత చెవులు రిక్కించుకొని వినాల్సింది, టీవీల్లో కళ్ళు పొడుచుకొని చూడాల్సింది ఏముంది?
చర్చనీయాంశాలు: ధరలు, బూర్జువా పార్టీలు, ఎన్నికల ఫలితాలు, టిడిపి, బిజెపి, తెరాస

---

ఈరోజు 16.05.14 తెల్లవారి రోడ్డు మీది నడవటం ప్రారంభించ గానే, ఒక ఇస్త్రీ బండి అబ్బాయి అడిగాడు, ఏమిటి పరిస్థితి అని. అతడి ఉద్దేశ్యం రాష్ట్ర ఎన్నికలలో పార్టీల పొజిషన్ ఏమిటి , అని.

నా మైండ్ వేరే చోట ఎంగేజ్ అయ ఉన్నది. మా నాన్న గారు 86 ఏళ్ళవాడు, యాత్రల మీద వ్యామోహం, కొంచెం ఎండతగ్గగానే మేము నీకు అన్నియాత్రలు చూపిస్తాము అనిబ్రతిమాలుతున్నా వినకుండా, ఇంట్లో చెప్పకుండా వెళ్ళి మూడురోజులయింది. రైళ్ళు ఎక్కలేడు, బస్సులు ఎక్కలేడు, ఏమయ్యాడో ఏమిటో నని, మేము రైలు బస్సు స్టేషన్ ల చుట్టూ తిరుగుతున్న సమయంలో చివరికి ఫలించి ఆయన ఇంటికి చేరాడు . ఆ ఆనందంలో మేము ఉండి, తెలిసిన వారు ఎదురైనపుడు మీనాన్నగారు వచ్చారా అని వారడగటం, అవునండీ కథ సుఖాంతం అని చెప్పటం ఇలా ''ఊయలలూగే మనసూ'' అన్నట్లయింది.

ఆ ఇస్త్రీ మాస్టర్ నావంక ఎగాదిగా చూసి కథ సుఖాంతం అంటే చంద్రబాబా జగనా అన్నాడు. ఇస్త్రీ పెట్టె మహా వేడి మీద ఉంది. అతడి మనసే, అతడి దగ్గర లేదు. బాబా, జగనా అన్నట్లు అతడి మనస్థితి ఉన్నది.

నేను సుఖాంతం అని చెప్పింది, మానాన్నగారు దొరకటం గురించి. అతడు మా నాన్నగారి గురించి అడుగుతున్నాడేమో ననుకొని ఆయన గురించి చెప్పాను. దీనినే మనం న్యాయ శాస్త్రంలో కన్ సెన్సస్ యడ్ ఇడెమ్ అంటాము. తెలుగులో మీటింగ్ ఆఫ్ దీ మైండ్స్. పరస్పర ఏకీభావం. ఇద్దరూ ఒకే వస్తువుగురించి ఆలోచించటం, వ్యవహరించటం.

బాబా , జగనా, త్వరగా చెప్పండి, ఎన్నికల్లో సుఖాంతం, దుఃఖాంతం ఏమిటి అని అతడు విసుక్కున్నాడు. మీరేదో సుఖాంతం సుఖాంతం, అంటున్నారు. (అతడు నాకు స్క్రూ లూజయిందనుకున్నాడు). ఈలోగా అతడు ఇస్త్రీ చేస్తున్న చొక్కాపై పై పెట్టెను అలాగే వదలివేయటంతో, చొక్కా కాలర్ నల్లగా కమిలింది.

''నేను, నా పొరపాటును అర్ధం చేసుకొని, ఉదయం తొమ్మిదిన్నర అయితే గానీ ట్రెండ్స్ బయటకు రావు. ఎందు కంత తొందర? మీరు వెయ్యాలనుకున్నవారికి మీ వోటు వేశారు కదా?'' అందామనుకున్నాను.

నాకు తెలిసిన ప్రకారం, అతడు తన కుటుంబ వోట్లను చక్కగా అమ్మేసుకుని , తనకు రావలసిన క్యాష్ ను రాబట్టుకొని, తన వోట్లయజ్ఞాన్ని పూర్తిచేశాడు. ఇంక ఎందుకు ఆరాటం? తాను డబ్బులు తీసుకున్న అభ్యర్ధికి వేశాడో, వేరొకరికి వేశాడో మనకి తెలియదు. తాను డబ్బు తీసుకున్న అభ్యర్ధికే వోటువేసి ఉంటే, అతడు గెలుస్తూ ఉంటే, అభ్యంతరం లేదు. తాను డబ్బుతీసుకున్న అభ్యర్ధికి వోటేయకుండా వేరొకరికి వేసి ఉంటే, తన నిర్ణయం సరియైనదా లేదా అని అతడు పరీక్షించుకోవాలనుకుంటున్నాడనుకోవాలి.

''నీకెందుకంత ఆరాటం, నీడబ్బులు నీకు వచ్చాయిగా '', అని అందామనుకున్నాను, కానీ అనకపోటమే మంచిదయింది. అనుంటే, అతడు నన్ను చెప్పు తీసుకొని కొట్టి ఉండే వాడు. ''నేను డబ్బులు తీసుకుంటే నీకెందుకు, తీసుకోకపోతే నీకెందుకు, అని వుతికేసేవాడు.''

విచిత్రమేమిటంటే, నావోటు, నాభార్యవోటు, మా అబ్బాయి వోటు కూడ అమ్ముడు పోయాయి. మా ఏరియాలో ఉండే పెద్దమనుషులు అనుకునేవారు, వారిని పెద్ద మనుషులు అనుకునే అభ్యర్ధుల దగ్గర, మాఇంట్లోని మూడు వోట్లకూ Rs. 1,500 x 3 = Rs. 4,500 చొ|| వసూలు చేసుకున్నాడు. ఆడబ్బులను తానే వాడేసుకున్నాడు. మా అబ్బాయి హైదరాబాదు వెళ్ళటం వల్ల వోటు వేయటం కుదరలేదు. నేను పోలింగు స్టేషన్ కి వెళ్ళుంటే నోటాకి వేసి ఉండే వాడిని. నోటా వల్ల నిష్ప్రయోజనం అని తెలిసింది కనుక, స్టేషన్ దూరంగా ఉండటాన , ఆటో ఖర్చులెందుకులే అని వోటు వేయలేదు. ఈవిధంగా మాఇంట్లో రెండు వోట్లు మురిగి పోయాయి. మూడో వోటు కూడ ఆ డబ్బులిచ్చిన అభ్యర్ధికి పడి ఉంటుందని నేను అనుకోను. ఏది ఏమైతేనేం, వోట్లు కొనుక్కున్న ఆఅభ్యర్ధికి మటుకు, రూ. 4,500 క్షౌరం అయ్యింది. ఈవిషయంలో నేను పోలీసురిపోర్టో, ఈసీకి ఫోన్ చేసినా పెద్ద ప్రయోజనకరమని నాకినిపించలేదు. ఎందుకంటే , మానాన్నగారి మిస్సింగు విషయంలోనే , పోలీసు స్టేషన్ కి వెళ్ళి రిపోర్టు ఇచ్చినపుడు, నేను ఆశించిన పధ్ధతిలో, నాకు వారినుండి సహాయం లభించలేదు. అలాంటప్పుడు ఎవరో , ఇంకెవరి దగ్గరో మీవోట్లకో సం డబ్బులు తీసుకున్నారంటే, మేమెట్లా నమ్మటం , సాక్ష్యాలేమన్నా ఉంటే తీసుకురా అని ఉండే వాళ్లు.

కొన్ని షాకులు మనకి తెలిసినవే అయినా విలవిల లాడిస్తాయి

తెల్లారి లేవగానే, పాలప్యాకెట్ లకి వెళ్తాం. ఇవాళ్టినుండి ప్యాకెట్ రూపాయి పెరిగింది, అని తక్షణమే అమలు లోకి వచ్చింది. పాల ప్యాకెట్ల ధరలు మూడు నెలలకో ఆరునెలలకో పెంచటం మనకి తెలిసిన విషయమే. డీజెల్ కూడ, అంతే, వీటికి షాక్ పొందాల్సిన అవసరం లేదు. ఎన్నికలయి పోయినాయి, సమీపంలో ఐదేళ్ళదాకా ఇంకే ఎన్నికలులేవు, అని తెలిసినపుడు, ఇంక కేంద్ర రాష్ట్ర ప్రభుత్వాలకూ, ప్రైవేటు వారికీ కూడా ఆటవిడుపే.

పెంచిన ధరలో కొంత భాగమైనా, ఉత్పత్తిదారుకి చేరినపుడు పాలధర పెంపుపై మనం నిరసన తెలుపనవసరం లేదు. ఎందుకంటే, మద్యం ధర పెరిగినంత వేగంగా పాల ధర పెరగటంలేదు. సినిమాటికెట్ల ధర పెరిగినా మద్యం ధర పెరిగినా, చికెన్ బిరియానీ ధర పెరిగినా, చెంగు చెంగునా గంతులు వేసుకుంటూ కొనే వాళ్ళే, పాలధర పెరిగినపుడు ఎందుకు ఏడుపు ముఖం పెడ్తారో అర్ధం కాదు.

నాబాల్యంలో మాకు ఒకటి | రెండు గేదెలు ఉండేవి. వాటికొరకు కిలోమీటరు దూరం నుండి గడ్డిమోపులు మోసుకురావటం , పేడతీసి పిడకలు కొట్టటం , ఇళ్ళ దగ్గర పాలు పోసిరావటం, వంటి పనులను నేను చేయటం వల్ల పశుపోషణలోనాకు నరేంద్రమోడీగారు చాయ్ వాలా పనిచేయటం, లాంటి అనుభవమే ఉంది. మా గేదె(లు) ఎండాకాలంలో సరియైన నీడలేక ఎండకి ఎండుతూ ఉండేవి, వానాకాలంలో సరియైన కొష్టం లేక తడుస్తూ ఉండేవి. చలి ఎక్కువైనపుడు పాలు సరిగా ఇచ్చేవి కావు.

ఒక సుఖాంతం కథ

పెద్దయినాక, బ్యాంకులో వ్యవసాయ ఋణాల క్షేత్రాధికారిగా పనిచేస్తున్న కాలంలో, ఒక దరఖాస్తుదారు మహిళ ఒక ప్రభుత్వ పథకం క్రింద రెండుగేదెల కొనుగోలుకు అప్లికేషన్ పెట్టి నా పైవిపరీతమైన వత్తిడి తెచ్చింది. నాకు ఆగ్రామస్తులే చాటుగా సమాచారం అందించారు. ఆమెకు ఇప్పటికే రెండు గేదెలున్నాయి. మీరు గనుక లోన్ ఇస్తే ఆమె తన గేదెలనే చూపించి డబ్బు కొట్టేస్తుంది. ఆమెకు లోన్ ఇవ్వకండి, ఇస్తే మేము పై అధికారులకి ఫిర్యాదు చేస్తాము, తరువాత మమ్మల్ని అడగకండి, అని బెదిరించారు. గ్రామ రాజకీయాలలో ఈ బెదిరింపులు, ఇకిలింపులు, సకిలింపులు ఒక భాగం. అయితే, ఎన్ని రాజకీయాలున్నా, గ్రామస్తులు, తమ స్వార్ధానికి అనుకూలంగా నిజానిజాలను రోడ్డుమీదికి వదులుతూ ఉంటారు. వారు నిజాలు చెప్పినపుడు మనం వాటిని పట్టించుకోకుండా ముందుకు వెళ్తే మేం చెప్పినా వినలేదు, అని ఫిర్యాదులు చేస్తారు. తెలియక పొరపాటు పడటం , చెప్పినా వినకపోటం రెండిటి మధ్యా, చాలాభేదం ఉన్నది.

ఒక రోజు ఆమె బ్యాంకుకు వచ్చి వారేదో చెప్పారని మీరు నాకు లోనివ్వకపోతే ఎలా? నాకు ఏ గేదెలూ లేవని, నేను ఫలానా కులానికి చెందిన దానిననీ, వీడీవో సర్టిఫికెట్ ఇచ్చాడు, ఎంపీడీవో రికమెండ్ చేశాడు. మహిళలన్నా, తక్కువకులాలకు చెందిన వాళ్ళన్నా మీకు చులకనలా ఉంది, అది మంచిది కాదు. గవర్నమెంటు ఇస్తానంటుంటే, మీరెందుకు అడ్డం పడతారు అన్నది. కళ్ళనీళ్ళు కూడ పెట్టుకున్నది.

దీన్ని పరిష్కరించటానికి నేను ఒకరోజు పెందలాడి నిద్దరలేచి, ఆమె ఉన్నగ్రామానికి నడుచుకుంటూ వెళ్ళాను. అది ఇప్పటిలాగానే మే నెల. ఎండ వేడి 45 డిగ్రీలదాకా చేరి ఉంటుంది. ఆమె ఇంటికి వెళ్ళాను. ఇల్లు తాళం వేసి ఉన్నది. ఆవరణలో రెండు బర్రెలు కట్టేసి ఉన్నాయి. మేత చాలక గింజుకుంటున్నాయి. రెండూ, ఎండకి ఎండుతున్నాయి. అవి ఆమె బర్రెలే నని అర్ధం అయ్యాయి. ఆమె ఎండు గడ్డి ఎవరో బదులిస్తానంటే, తేవటం కోసమని వెళ్ళిందని పక్కవాళ్ళు చెప్పారు.

నేను ఈలోగా బాకీలు వసూలు చేసుకోటానికి ఇళ్ళ వెంబడి పోయాను. నా కది అలవాటు. సాధారణంగా బ్యాంకుల క్షేత్రాధికారులు, మేనేజర్లు ఏమి చేస్తారంటే, వాళ్ళు చిన్న బకాయి దారుల ఇళ్ళచుట్టూతిరగరు. ఏ పెత్తందారింట్లోనో కూర్చొని గ్రామ కావలిదారునో, లేక పెత్తందారు జీతగాడినో ఫలానా వెంకమ్మను పిలుచుకు రమ్మని ఫరమాయిస్తారు. వారు అతడిని |ఆమెను పిలుచుకు రావటమో, లేక ఇల్లు తాళం వేసుందనో చెప్తారు. నేను ఇల్లిల్లూ తిరగటం వల్ల వారు అప్పు కట్టలేక పోటానికి కారణాలు ఇల్లు చూసినపుడు అర్ధం అవుతుంది. నేను వాళ్ళింటికి వచ్చి వెళ్ళానని తెలిసాక, బకాయిదారులు సాధారణంగా బ్యాంకుకు వచ్చి తమ సమస్యలు వివరించుకొని వెళ్ళే అలవాటును నేను ప్రోత్సహించాను.

నేను వీధులు కవర్ చేసుకుని , మొదట వెళ్ళిన గేదెల దరఖాస్తుదారు ఇంటికి వెళ్ళేసరికి గాలి దుమారం, వాన వచ్చాయి. ఆ గేదెలు ఆవానకి గింజుకున్నా ఎక్కడికీ వెళ్ళలేక అక్కడే నానుతున్నాయి. ఈసారి ఆమె ఇంటి తలుపులు తెరుచుకు ఉన్నాయి. ఆమె ఇంటిముందు ఒక ఎండు గడ్డిమోపు పడేసి ఉంది.

నన్ను చూసి ఆమె లేచి వచ్చింది. ''చూశారు కదా'', అన్నది. నీకు కావలసింది గేదెలు కాదు, నీకు కావాల్సింది షెడ్ కు లోన్. నీవు గేదెలపేరుతో లోన్ తీసుకున్నా ఆడబ్బుతో కొత్త గేదెలను కొని ఉండేదానివి కాదు. షెడ్ వేసి ఉండే దానివి. కొంత డబ్బుతో గడ్డి కొని ఉండేదానివి. నీకు షెడ్ కొరకే , దానికి అవసరమైనంత లోన్ ఇప్పించే ప్రయత్నం చేస్తాను అని ఆమెను ఓదార్చి నేను కార్యాలయానికి వెనక్కి వచ్చాక, మా బాస్ తో ఈవిషయాన్ని ప్రస్తావించాను. ఆమెకు మనం షెడ్ నిర్మించుకోటానికి ఒక మధ్యకాలిక ఋణం ఇద్దాం, అని ప్రతిపాదించాను. బెంగుళూరు పెంకులు, ఇటుకలు , సిమెంటు స్థంభాలు తెచ్చుకొని, ఆమె షెడ్ వేసుకుంటుంది అన్నాను. ఈవిధంగా, ఆమె సత్యం చెప్పినట్లు అవుతుంది. మనం, అర్హత, అవసరం ప్రాతిపదికగా ఋణం ఇచ్చినట్లవుతుంది. గ్రామస్తులుకూడ కంప్లెయింటు చేయటానికి అవకాశం ఉండదు.

ఆయన నవ్వి , నీకు వాస్తవిక, ఆచరణాత్మక దృక్పథంలేదోయ్. ఇపుడు ఈ ఏడాది షెడ్లకు గవర్నమెంటు పథకాలుగానీ బ్యాంకు డైరక్టులోన్ పథకాలు గానీ లేవు. అవి ఎప్పుడొస్తాయో తెలీదు. ఆమె షెడ్ కట్టాలనుకుంటున్న స్థలం ఆమె కొన్నదో, ఆక్రమించుకున్నదో తెలియదు. రెండు గేదెల పథకం క్రింద, గవర్నమెంటు ఆమెకు సబ్సిడీ ఇస్తుంది. మార్జిన్ ఇస్తుంది. ఆమె మనం ఇప్పించిన గేదెలను అమ్ముకుంటే నీకెందుకూ, ఉంచుకుంటే నీకెందుకు. ఇలా అయితే నీవు ఒక్క స్కీమును కూడ గ్రౌండ్ చేయలేవు అన్నాడు.

నేను కూడ ఆలోచించుకున్నాను. మనం షుగర్ ఫ్యాక్టరీకి లోన్ ఇస్తాము. వాడు కొన్ని కోట్లు తీసుకెళ్తాడు. అందులో వాడు కొన్ని కోట్లను ఏ డిస్టిలరీకో (సారా తయారీ యూనిట్) మళ్ళిస్తాడు. లేకపోతే బియ్యం స్పెక్యులేషన్ చేస్తాడు. వాడి లీలలన్నీ మనకి తెలిసినా, వాడిని మనం నిలదీయట్లేదు కదా. ఈమె తన లోన్ తో షెడ్ వేసుకోటం పాపమా? వస్తుందో రాదో తెలియని ఆ షెడ్ స్కీముపై ఆమెకు ఆశలు పెంచే కన్నా, ఇదే మేలేమో, అని సర్దుకున్నాను.

చివరికి ఆమెకు, మేనేజరు గారి ఆజ్ఞ ప్రకారం, ప్రభుత్వ పథకం క్రింద గేదెలనిప్పించటం, జరిగింది. ఆమె తన రెండు పాత గేదెలలో ఒకదానిని, రెండు కొత్త గేదెలలో ఒకదానిని అమ్ముకున్నది. డబ్బులు మిగిలినట్లున్నాయి. ఒక చిన్న కొష్టాన్ని కూడ నిర్మించు కున్నది. ఒక పాత ఒక కొత్త రెండు గేదెలు సమకూరాయి. లోన్ కొంత కట్టింది. కొంత కట్టలేదు. మిగిలింది రాని బాకీల క్రింద మాఫీ చేయబడింది. మొత్తానికి కథ సుఖాంతం అయ్యింది.

బ్యాక్ టూ ఎన్నికల ఫలితాలు

తెలంగాణలో తెరాస, శేషాంధ్రలో టిడిపి, వైయస్ ఆర్ పీ, అఖిల భారత స్థాయిలో బిజెపి ఎన్ డి ఎ ముందంజలో ఉంటాయనేది బాలీవుడ్ క్లైమాక్సులా మనకు ముందే తెలిసిందే. ఈమాత్రం దానికి ఇస్త్రీ పెట్టెను షర్ట్ మీద వదిలేసి దానిని మాడకొట్టాలా?

కథ సుఖాంతమవుతుందా, దుఃఖాంతమవుతుందా?

బూర్జువా పార్టీల్లో ఎవరు గెలిస్తే ఏమి లాభం? వ్యభిచార గృహాల్లో బంధితులైన స్త్రీల పరిస్థితి ఎలా ఉంటుందో, భారత పౌరుల పరిస్థితి కూడ అంతే. వాడైతేనేం, వీడైతేనేం, ప్యాసింజరనే వాడు, అంగచూషణం చేయమని డబ్బులాశ చూపేవాడే కదా. ఇష్టపూర్తిగా పాల్గొంటే, రేప్ అయినా మధురమే కదా. కొంత అసభ్యంగా వ్రాయవలసి వచ్చినందుకు క్షమాపణ కోరుతున్నాను. ఈదుఃఖ సమయంలో ఇంతకన్నా వ్రాయలేను.

ఏది ఏమైనా, శ్రీ నరేంద్రమోడీ, శ్రీ చంద్రబాబు, శ్రీ కెసిఆర్ లకు మన అభినందనలు.

శ్రీచంద్రబాబు నాయుడు గారు, మద్యనిషేధం విషయంలో రాష్ట్ర ప్రజలను మోసగించారు. మద్యనిషేధ ఉద్యమంలో ప్రముఖ పాత్ర పోషించిన, మల్లాది సుబ్బమ్మగారు కీర్తిశేషురాలు కావటం ఖేదకరం. శ్రీచంద్రబాబు నాయుడుగారిని , మద్య నిషేధాన్ని శేషాంధ్రప్రదేశ్ లో తిరిగి ప్రవేశ పెట్టి, రాష్ట్రమహిళామణులను రక్షించవలసిందిగా ప్రార్ధిద్దాము.

శ్రీ కెసీఆర్, ఆయన కుటుంబం, ఇంక విజృంభించే అవకాశం ఉంది. వారు కుటుంబ నియంతృత్వ దిశగా పయనించినా ఆశ్చర్యపోనవసరం లేదు.

ఆంధ్ర ప్రదేశ్ మాజీ గవర్నర్, మాజీ కేంద్ర మంత్రి శ్రీ ఎన్ డీ తివారి గారు చివరికి ఉజ్వలా శర్మగారిని 89 ఏళ్ళ వయసులో సాంప్రదాయ బధ్ధంగా వివాహంచేసుకొని, ఆమెకు సముచిత స్థానాన్ని కల్పించటం ముదావహం. (ఈ సందర్భంగా శ్రీ ఎన్ డీ తివారీ పై -ఆయన +ఉజ్వల శర్మల- పుత్రుడు చేసిన న్యాయ పోరాటాన్ని గుర్తు తెచ్చుకోండి. శ్రీ నరేంద్రమోడీ గారు కూడ తన ధర్మపత్ని జశోదాబెన్ గారికి సముచిత స్థానాన్ని కల్పిస్తారని ఆశిద్దాము.

(దీనిని ఇంకా కొంత మధురంగా ఉండేలా తిరగవ్రాస్తాను).

235 What is the difference between a donkey, angel and a man?

235 What is the difference between a donkey, angel and a man?
235 గాడిదకు, దేవదూతకు, మనిషికి తేడా ఏమిటి?
చర్చనీయాంశాలు: నరేంద్రమోడీ,మమతాబెనర్జీ,బెంగాల్, మతతత్వం,బంగ్లాదేశ్,శ్రీలంక,తమిళనాడు,కవి చౌడప్ప

---

2014 ఏప్రిల్, మే ఎన్నికల ప్రచారంలో Ms. మమతా బెనర్జీ అన్నారని చెప్ప బడుతున్న కొన్ని మాటలు:--

“Is he bhonda (fool) or gadha (donkey)? Motuas already have voting rights. One of them is a minister of ours and another an MLA. He is saying nonsense like a mad person. A Haridas Pal (useless person), who does not have an MLA here, is promising all these,”

తెలుగు సారం: ఆయన మూర్ఖుడా లేక గాడిదయా? మోటువాలకు (బంగ్లా నుండి భారత్ కు వచ్చిన ఒక హిందూ తెగ) ఇప్పటికే వోటింగు హక్కులున్నాయి. వారిలో ఒకరు మా వద్ద మంత్రిగా ఉన్నారు. ఇంకొకరు ఎం.ఎల్.ఏ గా ఉన్నారు. ఒక పిచ్చివాని వలె ఆయన (మోడీ అని భావం) అర్ధరహితంగా మాట్లాడుతున్నారు. ఒక హరిదాస్ పాల్ (మిస్టర్ నోబడీ అని భావంట), కనీసం ఇక్కడ ఒక ఎం.ఎల్.ఎ. కూడ లేని వాడు, ఈ వాగ్దానాలన్నీ చేస్తున్నాడు.

“It was our courtesy that we had allowed Modi here, otherwise we would not have allowed him to get down from the aircraft. He had said so many incriminating things here, it is so unfortunate,”

తెలుగు సారం: మేము మోడీని ఇక్కడ అనుమతిస్తున్నామంటే అది ఒక మర్యాదయే, లేకపోతే, మేము ఆయనను విమానం నుండి దిగనిచ్చే వాళ్ళము కాము. ఆయన చాల ఇక్కడ నేరపూరితమైన లేక నేరారోపణకి దారితీసే మాటలు అన్నారు, ఇది చాల దురదృష్టకరము.

"We are allowing Modi to campaign in Bengal is our courtesy, we could have sent him back packing from the airport,"

తెలుగు సారం: మేము మోడీని బెంగాల్ లో ప్రచారం చేయనిస్తున్నామంటే, అది మా మర్యాదయే, లేదంటే ఆయనను మేము విమానాశ్రయంనుండే ప్యాకింగు చేయించి వెనక్కి పంపే వాళ్ళం.

"People of Bengal were being dubbed as refugees and shamed. Some people were being called infiltrators. If they try to divide Bengal, if they try to evict anyone, I will guard you. I will not let anyone touch you. He said I respect refugees. Who is a refugee? Does he understand what it means?"

తెలుగు సారం: బెంగాల్ ప్రజలు శరణార్ధులుగా ముద్రించబడుతున్నారు, మరియు అవమానించబడుతున్నారు. వారిలో కొందరు చొరబాటుదారులుగా పేర్కొనబడుతున్నారు. వారు బెంగాల్ ను విభజించాలని ప్రయత్నిస్తే, వారు మిమ్మల్ని (బంగ్లాదేశ్ కి) గెంటి వేయాలని ప్రయత్నిస్తే, నేను మిమ్ములని రక్షిస్తాను. నేను ఎవరిని మిమ్మల్ని ముట్టుకోనివ్వను. ఆయన అన్నాడు, శరణార్ధులను గౌరవిస్తానని. ఎవరు శరణార్ధి? ఆయన ఏమంటున్నాడో ఆయనకు తెలుసా?

"I had raised the issue of bogus ration cards in Bengal."

తెలుగు సారం: నేను బెంగాల్ లోని బోగస్ రేషన్ కార్డుల విషయం లేవనెత్తాను. (శ్రీ మోడీ ఆరోపణ ప్రకారం, చొరబాటు దారుల విషయాన్ని, Ms. మమతా బెనర్జీగారు గతంలో లోక్ సభలో లేవనెత్తారు. ఇపుడు వోట్ల కొరకు ఎలా వెనక్కి వెళ్తారు? మమతా గారి ప్రకారం, ఆమె లోక్ సభలో లేవనెత్తింది బెంగాల్ లో బోగస్ రేషన్ కార్డుల గురించే).

వైబీరావు గాడిద వ్యాఖ్య లు Comments of ybrao a donkey वैबीराव एक गधे की टिप्पणियाँ

మమతా మరియు మోడీ ల మధ్య జరుగుతున్న వాగ్ యుధ్ధం వోటు బ్యాంకు రాజకీయమే. అయినా మూల వివాదాన్ని, దానిలోంచి పుట్టే ప్రశ్నలను, భారత కేంద్ర ప్రభుత్వం నిపుణుల చేత పరిశీలింప చేయవలసి ఉన్నది. అవి:

1. తూర్పు పాకిస్థాన్ (ఇపుడు బంగ్లాదేశ్) , పశ్చిమ పాకిస్థాన్ మరియు భారత్ ల మధ్య 1947లో జరిగిన విభజన మతపరమైనదా కాదా?

2. మత పరమైనదే అయితే జనాభాల మార్పిడి అప్పుడే పూర్తి స్థాయిలో జరిగి ఉండ వలసినది. జరగలేదు. కొందరు హిందువులు అక్కడ ఉండిపోయారు. కొందరు ముస్లిములు ఇక్కడ ఉండి పోయారు.

౩. వోట్ల కోసం గానీ, మరే కారణంచేతనైనా గానీ, మమతా బెనర్జీగారు పశ్చిమ బెంగాల్, మరియు బంగ్లాదేశ్ మొత్తాన్ని ఒక బెంగాల్ దేశం గా చూస్తున్నది. అది రాజ్యాంగ విరుధ్ధం. బంగ్లాదేశ్ పౌరులలో అధికులు బెంగాలీ భాష మాట్లాడినంత మాత్రాన, 1947 తరువాత నుండి పాకీస్థానీలు లేక బంగ్లా దేశీయులే అవుతారే తప్ప , భారతీయ బెంగాలీలు అవరు. ఇదే విషయాన్ని మనం శ్రీలంక తమిళుల విషయంలోనూ గమనించాలి. వోటు బ్యాంకు రాజకీయాల కొరకు తమిళ ప్రాంతీయ పార్టీలు శ్రీలంక తమిళులను భారతీయ తమిళులతో సమానంగా చూడటం, రాజ్యాంగ విరుధ్ధమే అవుతుంది.

4. తమిళం మాట్లాడినంత మాత్రాన శ్రీలంక తమిళులు భారతీయ తమిళులు కాలేరు. బెంగాలీ మాట్లాడినంత మాత్రాన బంగ్లా జాతీయులు భారతీయ బెంగాలీలు కాలేరు. వారు భారతదేశంలోకి అనుమతి పత్రాలు లేకుండా వచ్చారంటే చొరబాటు దారులే అవుతారు. వారిని చట్టప్రకారం గెంటి వేయాల్సి వస్తుంది. వారికి వోటింగు హక్కులు ఇవ్వటం కుదరదు. రేషన్ కార్డులు ఇవ్వటం కుదరదు.

మోడీ గారి మాటలను బట్టి చూస్తుంటే, ఆయన బెంగాల్ నుండి భారత్ లోకి పారిపోయి వచ్చిన, లేక చొరబడ్డ హిందువులకు పౌరసత్వం ఇవ్వటానికి, వారినుండి వోట్లు రాబట్టుకోటానికి సిధ్ధంగా ఉన్నారు. ఆయన దృష్టిలో ముస్లిములను మాత్రమే చొరబాటు దారులుగా పరిగణించాలి.

మమతా గారి మాటలని బట్టి చూస్తుంటే, తనకు వోటేసే వాళ్ళు, బెంగాలీలయి ఉంటే చాలు. హిందువులైనా , ముస్లిములైనా చొరబాటుదారులుగా పరిగణించబడరు.

శరణార్ధుల సమస్య

శరణార్ధికి చొరబాటుదారుకి తేడా మనం గుర్తించటం అవసరం. శరణార్ధి కేవలం తన ప్రాణ రక్షణ కొరకు భారత్ లో కి ప్రవేశిస్తాడు. అతడు సాధారణ నేరగాడు గానీ, ఉపాధి వెతుక్కునే వాడు గానీ కాదు. అతడికి ప్రాణాపాయం లేకుంటే, అతడు భారత్ కి రాడు. వచ్చినా రెండు మూడు సంవత్సరాల కన్నా ఉండకూడదు. అతడికి మనం వోటింగ్ రైట్స్ ఎన్నటికీ ఇవ్వలేం. తాత్కాలికంగా వారిని గుడారాలలో ఉంచి వారికి తాత్కాలిక రేషన్ కార్డులను ఇవ్వాల్సి ఉంటుంది.

ఇక్కడ సమస్య ఏమిటంటే, వారిని వారి మాతృదేశం ఎన్నటికీ వెనక్కి తీసుకోటానికి ఇష్టపడకపోతే వారిని ఏమి చేయాలి? వారికి భారత పౌరసత్వం ఇచ్చి 128 కోట్లమంది భారతీయులలో కలిపేసుకోవాలా? మనది ఇప్పటికే అధిక జనాభా గల దేశం. ఇంక అదనపు జనాభాను మోయలేం. అంతే కాకుండా, శరణార్ధులకు మనం ఉదారంగా పౌరసత్వం ఇస్తున్నామని తెలిస్తే, బంగ్లాదేశ్, పాకిస్థాన్ , శ్రీలంక, చైనా (టిబెట్, ఉలుఘూ ) దేశాలు మనకి శరణార్ధులని సరఫరా చేయటానికి సిధ్ధంగా ఉంటాయి.

మతం గానీ, కులం గానీ, భాష గానీ విఛ్ఛిన్నం అయ్యే స్వభావం కలవాళ్ళను (groups with fissiparous tendencies, separatist tendencies) ఎక్కువ కాలం కలిపి ఉంచలేవని బంగ్లాదేశ్ అవతరణ, తెలంగాణ అవతరణ ఋజువు చేశాయి. తెల్లవాళ్ళు (యూరప్, అమెరికా, ఆస్ట్రేలియా, కెనడా, న్యూజీలాండ్) శ్వేత జాత్యహంకారంతో ఒకటిగా ఉన్నట్లు కనిపించినా , వారిలోనూ లుకలుకలు ఉన్నాయి. లేకపోతే రెండు ప్రపంచ యుధ్ధాలు ఎలా జరుగుతాయి. ఉక్రెయిన్ లో నేడు జరుగుతున్నది రష్యా యూరప్ ల మధ్య ప్రాక్సీ యుధ్ధమే కదా.

కాబట్టి వోట్లకొరకు గానీ, వోట్లేతరం కొరకు గానీ, చొరబాటుదారులను ప్రోత్సహించటం మంచిది కాదు. వారు హిందువులయితే నేను రెడీ అని మోడీ గారనటం, వారు బెంగాలీలయితే ముస్లిములయినా సరే నేను మీరక్షకురాలనని మమతాగారు పోజు కొట్టటం, దేశాన్ని చొరబాటుదారులతో నింపేస్తుంది. ఈ వ్యాఖ్య శ్రీలంక తమిళుల విషయంలో తమిళనాడు పార్టీలకు కూడ వర్తిస్తుంది.

ఈనాటి పద్యం.
కవి చౌడప్ప విరచితం. ఈయన తంజావూరు రఘునాధనాయకుని సమకాలికుడు. బహుశా కొంతకాలం ఆస్థాన కవి అయి యుండ వచ్చు.

ఆడిన మాటలు తప్పిన -
గాడిద కొడు కంచు తిట్టగా విని, మదిలో
వీడా నాకొడు కని ఏడ్చు
గాడిదయును కుందవరపు కవి చౌడప్పా !

సారం: అబధ్ధాలు ఆడే ఒకడిని గాడిద కొడకా అని తిట్తే, గాడిద కూడ, వీడా నా కొడుకు అని ఏడ్చింది.

దీని రెండవ భాగం త్వరలో వ్రాస్తాను.

234 Municipal and Panchayat Raj Election results in A.P. and Telangana

234 తెలంగాణ మరియు శేషాంధ్రలో మ్యునిసిపల్ మరియు పంచాయత్ రాజ్ ఎన్నికల ఫలితాలు

చర్చనీయాంశాలు: మునిసిపాలిటీలు, పంచాయతీలు, జిల్లాపరిషత్ లు, బూర్జువా పార్టీలు, మన్మోహన్ సింగ్

---

2014 తెలంగాణ, సీమాంధ్ర, పురపాలక, పంచాయత్ రాజ్ (ఎంపీటీసీ, జెడ్పీటీసీ) ఎన్నికల ఫలితాల గురించి మనం పెద్దగా ఆలోచించ వలసిన పనిలేదు. టీడీపీ అయినా, వైఎస్ ఆర్ పీ అయినా , కాంగ్రెస్ అయినా , తెరాస అయినా ఇంకోళ్ళయినా ఇంకోళ్ళయినా, అన్నీ బూర్జువా పార్టీలే కనుక ఆనందించాల్సిందీ, చింతించాల్సిందీ ఏమీ లేదు.

గ్రామాల్లో పేదలతో దగ్గరగా పని చేసిన నా ఆచరణాత్మక అనుభవంలో నేర్చుకున్న ఒక పాఠం ఏమిటంటే, కార్ల్ మార్క్స్ ఏమి చెప్పినప్పటికీ, భారత్ కి సంబంధించినంత వరకు, కనీసం ఆంధ్రప్రదేశ్ కి సంబంధించి నంత వరకు, ఎవరు బూర్జువాలు, ఎవరు పెటీ బూర్జువాలూ, వంటి వాటికి సరి యైన నిర్వచనాలు లేవు.

గ్రామీణ పేదల కోణం లోంచి చూస్తే, ప్రతి గ్రామ పెత్తందారూ బూర్జువా నే , లేదా కనీసం పెటీ బూర్జువానే.

అదే గ్రామ పెత్తందారు, నగరంలోనికి వచ్చినప్పుడు అతడికి ఉన్న జాయిదాద్ (ఆస్తి), అతడికి ఉన్న ఆమ్ దానీ, ఇవి అన్నీ నగర బూర్జువాల ముందు, నగర పెట్టుబడి దారుల ముందు బలాదూర్. ఆ గ్రామీణ పెత్తందారు తాను ఒక పిగ్మీ అని తెలుసుకోటానికి నగరంలో బడా పెట్టుబడిదారు ఇంటి ముందు నిలబడి పైకీ కిందకీ ఒకసారి చూస్తే చాలు, పది నిమిషాలలో అర్ధం అవుతుంది.

మనం గ్రామీణ పేదరికాన్ని అర్ధం చేసుకోవాలంటే, గ్రామీణ ప్రాంతాలనుండి సంపద పట్టణ ప్రాంతాలకు ఎందుకు తరలి పోతుందో అర్ధం చేసుకోవాలి. పట్టణ తయారీల, సేవల ఉత్పత్తి ఖర్చు ఎక్కువ, కనుక అమ్మకం ధరలు కూడ ఎక్కువ. గ్రామీణ తయారీల, సేవల, ఉత్పత్తి ఖర్చు ఎక్కువే అయినా, అమ్మకం ధరలను వారు పట్టణ వాసులపై, నగర వాసులపై వేగంగా పెంచలేక పోతున్నారు. కనుక గ్రామీణ తయారీలు, సేవలు గిట్టుబాటు ధరలు పొందక, గ్రామీణ దారిద్ర్యానికి దారి తీస్తున్నాయి.

దీనికి ఏకైక పరిష్కారం, గ్రామీణులు పట్టణ, నగర తయారీలను, సేవలను కొనటం మానేయాలి. ఇది సాధ్యమా? జవాబు: కొంత మేరకు సాధ్యమే. అయితే ఇది గ్రామీణ పెత్తందార్ల ఆధిపత్యంతో సాధ్యం కాదు. గ్రామీణ కూలీలు , మార్జినల్ రైతులు (అటు రైతూ కాదు, ఇటు కూలీ కాదు, మార్జిన్ లో వ్రేలాడుతూ ఉంటాడు), బక్కరైతులు (ఇతడు రైతని పేరే కానీ, వ్యవసాయాన్ని తన టరమ్స్ లో నిర్వహించలేడు, ఏట్లో పడి కొట్టుకు పోయే చిన్న పిన్నీసు బుట్ట పడవ లాంటి వాడు) అందరూ కలసి ఎంతో వివేచనతో ఆలోచించుకొని నిర్వహించుకోవాలి.

ఇంకో సారి వ్రాస్తాను.

మన్మోహన్ సింగు వీడ్కోలు

పదేళ్ల సేవ తరువాత ప్రధాని శ్రీ మన్మోహన్ సింగు గారు తమ పీఎంవో కు వీడ్కోలు చెప్పుకున్నారు. యుపిఏ గెలిచినా, ఆయనకు ప్రధాని అవకాశాలు మృగ్యం కావటంతో, కాలువ దగ్గరికి వచ్చినపుడు దానిని ఎలా దాటాలో నిర్ణయించుకోవాలని ఆయన ప్రకటించుకున్న ఆశయం నెరవేరలేదు. అసలు కాలువ దగ్గరికి చేరాక దానిని ఎలా దాటాలో నిర్ణయించుకోవాలనే ఆయన ఉద్దేశ్యం హ్రస్వ దృష్టితో కూడినది. అది బహుశా వరదల సమయంలో వర్తించ వచ్చు. దీనిని లాజిస్టిక్సు అనే కోణంలోంచి పరిశీలించాలి. లారీడ్రైవర్లను, లారీ సర్వీసుల నిర్వాహకులను అడిగితే చక్కగా వివరిస్తారు.

ఉదాహరణకి పాండిచ్చేరి నుండి కోల్ కత్తాకు టాంకర్లో ఏ ఫార్మల్ డీ హైడో రవాణా చేయాల్సి వచ్చినపుడు కనీసం క్లీనర్ గా ఒక్కసారైనా ఆరూటులో వెళ్ళి ఉండని డ్రైవర్ కి ఆరూటును అప్పగించరు. జాతీయరహదారి కాబట్టి భారీగా ధాబాలుంటాయి, అధిక సంఖ్యలలో లారీలు నిలిచిపోతుంటాయి కాబట్టి వరదలతో కూడిన కాలువలు ఎదురైనప్పుడు ఒక తరహా సమష్ఠి నిర్ణయాలు జరుగుతాయి.

అదే వినుకొండనుండి కర్నూలుకి కందిపప్పు లేక పత్తి తీసుకెళ్ళాల్సి వస్తే కొన్ని కల్వర్టులు, కాజ్ వేల దగ్గర ట్రాఫిక్కూ ఉండదు, ధాబాలూ ఉండవు. వాగు మధ్యలోకి వెళ్ళాక , ప్రవాహ ఉధృతికి లారీ ముందుకు పోదూ, వెనక్కీపోదు. స్టీరింగు కొంచెం పట్టుతప్పినా, లారీ ప్రవాహంలో కొట్టుకు పోతుంది. అంటే NH 5 పై లారీ నడపటానికీ, గుంటూరు కర్నూలు రహదారి లో లారీ నడపటానికీ చాలా తేడా ఉంది. జాతీయరహదారిపై నడిపేవాడికి తానే నిర్ణయం తీసుకుని వాగులో కొట్టుకుపోయే ఛాన్సులు రావు. వినుకొండ నుండి నంద్యాల పోయేవాడికి వస్తుంది.

నాకు మన్మోహన్ సింగు గారి ఆర్ధిక విధానాలను చూస్తుంటే చాల వ్యధ కలుగుతుంది. విదేశీ పెట్టుబడులు అనే గుండ్లకమ్మలాంటి వాగులో ఆయన భారతీయ ఆర్ధిక వ్యవస్థను దించారు.
మధ్యలో ఆయన స్టీరింగు వదిలేసినా, ఇతరులు ఆయన దగ్గరనుండి స్టీరింగును గుంజుకున్నా పరిస్థితులలో మార్పేమీ ఉండదు. రాబోయే పరిస్థితులను సరిగా అంచనా వేసుకోటం, లారీడ్రైవరుకి అంచనా వేసుకోటం ఎంత అవసరమో , అంతకన్నా ఎక్కువ అవసరం దేశాన్ని డ్రైవింగు చేసే ప్రధాన మంత్రికి ఉంటుంది.




ఈనైపుణ్యం నరేంద్రమోడీకీ లేదనుకోండి. అందుకే ఆయన విదేశీ పెట్టుబడులు అని ఊగుతున్నాడు. విదేశీ రిటైలుకు అభ్యంతరం కూడ ఏమిటంటే, ఆయనకు దానిలోని రిస్కులు అర్ధమయ్యికాదు, ఆయన పార్టీ సమర్ధకులైన మధ్య శ్రేణి వర్తకులకు అభ్యంతర కరమైనందుకు.

భారతీయ ఆర్ధిక వ్యవస్థకు వీరందరు కలిసి చేస్తున్న అపకారం ఆనాడు అంభి, జయచంద్రుడు, మహమ్మద్ జాఫర్, మహమ్మద్ ఖాసిం మొ|| వారు చేసిన కీడు కన్నా తక్కువ కాదని భారతీయ ప్రజలు అర్ధం చేసుకోలేక పోతే ఎవరి తప్పు?

ఈనాటి కంద పద్యం

మంత్రిగలవాని రాజ్యము
తంత్రము సెడకుండ నిలుచు తరచుగ ధరలో
మంత్రి విహీనుని రాజ్యము
జంత్రపు కీలూడినట్లు జరుగదు సుమతీ!

లారీలు, కార్లు, బైకులు నడిపే వాళ్ళకి బాగా అనుభవం. ఒక స్క్రూ కీలక ప్రదేశంలో ఊడినా కోట్లు చేసే ఆడీ కారైనా, బెంజికారైనా సరే మొరాయిస్తుంది. ఎయిర్ బస్ 380 అయితే నేలకూలుతుంది. జంత్రపు కీలూడటం అంటే అది.

ఈ మంత్రి అనేవాడు కేవలం నిమిత్త మాత్రుడు, దీర్ఘసూత్రుడూ కారాదు. ప్రాప్త కాలజ్ఞత్వం అవసరమే అయినా దీర్ఘదర్శిత్వానికి సాటిరాదు.

233 Visit of the Central team for selecting Seshandhra Capital

233 Visit of the Central team for selecting Seshandhra Capital

233 శేషాంధ్రకు రాజధానిని ఎంపిక చేయటానికి పంపబడిన కేంద్ర అధికారుల బృందం

చర్చనీయాంశాలు: సీమాంధ్ర, శేషాంధ్ర, రాజధాని, విశాఖ, రాయలసీమ, కర్నూలు, విగుంతె

---

కేంద్ర ప్రభుత్వం వారు పంపిన అధికారుల బృందం వారు మాపులు ముందేసుకుని, విశాఖలో రాజధాని కవసరమైన డేటాకై ఏదో తంటాలు పడ్డారు. ఒక సంతోషకరమైన విషయం ఏమిటంటే, వారు విజయవాడకు సింహాద్రి ఎక్స్ప్రెస్ లో వస్తున్నారట. అపుడు కానీ సుమారు 350 కి.మీ. ల ప్రయాణం ఎంతటెడియస్ గా ఉంటుందో అర్ధం కాదు. వీళ్ళు డెల్టాలో తిరిగినంతకాలం అంతా పచ్చగా ఉన్నట్లు కనిపిస్తుంది. రాజమండ్రి కడియంలో పూలతోటలు చూసి సీమాంధ్ర అంతా అభివృధ్ధి చెందింది అని భ్రమ పడే అవకాశం ఉంది. వీరు తమ పర్యటనను రాయదుర్గంనుండో అనంతపురంనుండో మొదలెట్టి దొనకొండ, మార్కాపురం, గిద్దలూరు, గుంటకల్, నాగార్జునసాగర్, కడప, కర్నూలు, లను కూడ చూస్తే బాగుంటుంది. సంపూర్ణమైన అవగాహనకి గ్రీన్ బెల్టులతో పాటు, డ్రై బెల్టులను కూడ చూడాలి.

శేషాంధ్ర అనే పేరు ఎందుకు వాడుతున్నానంటే: 1) శేష అంటే శేషాచలం. తిరుపతిలోని సప్తగిరులలో (ఏడుకొండలలో) ఒకటి. నాదృష్టిలో ఇది రాయలసీమకు సంకేతం. 2) శేష అంటే మిగిలిన. తెలంగాణను కత్తిరించిన తరువాత మిగిలింది కనుక శేషాంధ్ర (Residual Andhra Pradesh). శేషాంధ్ర పాము ఆకారంలో ఉందనుకుంటే, తల అనంతపురం, తోక చివర శ్రీకాకుళం అవుతుంది.

శేషాంధ్ర గరిట ఆకారంలో ఉందనుకుంటే, అనంతపురం గరిట మూతి అవుతుంది. శ్రీకాకుళం, విజయనగరం, విశాఖ తోక అవుతుంది.

ఏవిధంగా చూసినా ఈచివరనుండి ఆచివరికి 700 కిలో మీటర్ల ప్రయాణం తప్పదు. గుంటూరు కర్నూలు, ఒంగోలు కర్నూలు ఘాట్ రోడ్లపై ప్రమాదాలు తప్పవు. వీటికి అదనంగా జాతీయ రహదారి నం. 5 పై అనవసరపు ప్రయాణాలు. వీటిని దృష్టిలో పెట్టుకుంటే విశాఖ శేషాంధ్రకు రాజధానిగా పనికిరాదు. కావాలనుకుంటే, విశాఖ రాజధానిగా, చుట్టుప్రక్కల ఉన్న ప్రాంతాలను కలిపి (అవసరం అనుకుంటే బరంపురం, కోరాపుట్ , రాయగఢ్, లను కలిపి మరొక కొత్త రాష్ట్రాన్ని తయారు చేసుకోవచ్చు. లేదు , భారతీయులు , తెలుగు వాళ్ళు వెల్డింగులకు తగరు అనుకుంటే, శ్రీకాకుళం , విజయనగరం, విశాఖ, తూగోజీ, లతో ఒక రాష్ట్రాన్ని ఏర్పరచ వచ్చు. పూర్వం గోదావరి ఉత్తర ప్రాంతమంతా గజపతులచే పాలించబడింది. విజయనగర రాజైన శ్రీకృష్ణదేవరాయలు దండయాత్రలకు వెళ్ళి సింహాచలంలో విజయ స్థంభాన్ని పాతినా, అది కప్పం వసూలు చేసుకోటానికి ఉపయోగ పడిందే కానీ, నిజమైన రాయల పాలన జరగలేదు.

తూర్పు సముద్రానికీ, రాయలసీమకు మధ్యలో నల్లమల అడవులు శేషాచలం కొండలు పెట్టని కోటగోడలులాగా ఉండి ఇరు ప్రాంతాల మధ్య రాకపోకలకు ఆటంకంగా ఉంది. ఘాట్ రోడ్ లలో దొంగల బెడద, వానాకాలం వాగులు పొంగి వాహనాలు కొట్టుకుపోటం, ఎత్తు పల్లాలకు ఒళ్ళు హూనం కావటం జరుగుతాయి. అందుకే మానసికంగా రాయలసీమ వారూ, కోస్తావారు కలిసి పోలేదు. రాయలసీమలో చిత్తూరు, కడప జిల్లాల వారికి చెన్నై సౌకర్యం. అనంతపురం, కర్నూలు వారికి బెంగూళూరు సౌకర్యం. అందుచేత, ఆఏడుకొండలవాడిని దర్శించుకోటానికి తప్ప కోస్తా , రాయలసీమల మధ్య రాకపోకలు లేవు. ఆప్రయాణం నెల్లూరు జిల్లా గూడూరుకి పశ్చిమ దిశగా, వెంకటగిరి, కాళహస్తిల మీదుగా జరుగుతుంది. తుంగభద్ర డాం, రాజోలిబండ పథకం వచ్చేక, కొందరు కోస్తాంధ్రులు హోస్పేట, బళ్ళారి, శాంతినగర్ (అలంపురానికి పశ్చిమం, తెలంగాణ) లలో కాలువ ఇరిగేషన్ భూములు కొని అక్కడకి వలసపోయి కాంపులను స్థాపించుకోటం జరిగింది. అక్కడ వాళ్ళు పక్కాగా వెల్డింగ్ అయ్యారని నేను అనుకోలేక పోతున్నాను. రాయలసీమ వారికి చెన్నై, బెంగుళూరు సౌకర్యం కావటం వలననే, వారు ఆంధ్ర ఉద్యమంలో పాల్గొనటానికి ఉత్సాహం చూపలేదు. వారికి నచ్చచెప్పటం కొరకే 1937 లో చెన్నయిలోని కాశీనాధుని నాగేశ్వరరావు పంతులుగారి శ్రీబాగ్ అనే భవనంలో ఆనాటి కోస్తానేతలు, రాయలసీమ నేతలు శ్రీబాగ్ ఒడంబడిక అనే ఒప్పందం చేసుకోటం జరిగింది. దీని ప్రకారం ఆంధ్రరాష్ట్రానికి రాజధాని రాయలసీమలో ఉండాలి. ఈరోజు రాయలసీమ నేతలు మౌనంగా ఉన్నా, తిరిగి వారు ప్రత్యేక రాయలసీమ ఉద్యమాన్ని తీవ్రంగా సాగించే అవకాశం ఉంది.

ప్రత్యేక రాయలసీమ అవసరం

కొత్తసీమాంధ్ర రాజధాని నిర్మాణానికి జరిగే వేలకోట్ల నిర్మాణ కాంట్రాక్టులలో వాటా కోసం రాయలసీమ రాజకీయవేత్తలు, గుత్తేదారులు, కోస్తా రాజకీయనేతలు, గుత్తేదారులు తన్నుకోటం నిశ్చయం. ఇది కాక రియల్ ఎస్టేట్ వ్యాపారాలలో, కొత్తరాజధానిలో ఎవరు ఎన్ని ఎక్కువ భూములను చేజిక్కించుకున్నారు అనేదానిపై ప్రవర్తనలు ఆధారపడి ఉంటాయి. దానికి అనుగుణంగానే మాఫియా ముఠాలు చెలరేగుతాయి. వీటిని దృష్టిలో ఉంచుకుంటే, రాయలసీమకు నేడే ప్రత్యేక రాష్ట్రం ఇవ్వటం మేలు. వారు ఎక్కువగా ముంబాయి చెన్నయి రైల్వే లైనుపై, కర్నూలు బెంగుళూరు రైల్వే లైనుపై ఆధారపడతారు. కోస్తావారు దానికి భిన్నంగా కోల్ కత్తా చెన్నయి ట్రంకు లైను పై ఆధార పడతారు.

నాదృష్టిలో క్రొత్త శాసన సభకు అప్పగించ వలసిన బాధ్యతలు

రాష్ట్రాన్ని మూడు ముక్కలు చిన్నరాష్ట్రాలు సౌకర్యవంతంగా విభజించుకొని, కొత్తజీవితాలను ప్రారంభించుకోటం. శాసనసభలో సభ్యుల సంఖ్య పెంచుకోటం, నియోజకవర్గాల వైశాల్యాన్ని తగ్గించుకోటం, ప్రతిమండలాన్ని ఒకనియోజకవర్గంగా ప్రకటించటం, శాసన సభ్యులకి కొన్నైనా ఎగ్జిక్యూటివ్ ఆధికారాలను, బాధ్యతలను ఇవ్వటం, ఎంఆర్ఓ గది పక్కనే శాసన సభ్యుడి గదిని ఏర్పాటుచేయటం, ఎంఆర్ఓ అధికారాలకి, శాసన సభ్యుడి ఆధికారాలకు మధ్య స్పష్టమైన విభజన రేఖలను గీయటం, శాసన సభ్యులు అధికార దుర్వినియోగం చేసినపుడు, అవనీతికి పాల్పడ్డప్పుడు క్రిమినల్ లయబిలిటీని నిర్వచించటం, ఇవన్నీ ప్రజాస్వామ్యాన్ని వికేంద్రీకరించటానికి దోహదం చేస్తాయి. ప్రస్తుతం 86,000 దాకా ఇస్తున్న ఇతర భత్యాలను తగ్గించి, ప్రభుత్వ అద్దె వాహనాలను ఏర్పాటుచేయాలి.

మూడు కొత్తరాష్ట్రాలకు మూడు రాజధానులను నిర్మించుకోటం.

ఈపని జగన్, చంద్రబాబు చేయరా?

చేయరు. చేస్తే వాళ్ళకేమి వస్తుంది? ఏమీరాదు, కనుక చేయరు. ఆయా జిల్లాల ప్రజలే తమ తమ శాసన సభ్యులపై వత్తిడి తెచ్చుకొని, ఈ 720 కిలోమీటర్ల ప్రయాణ బాదరబందీల నుండి తప్పించుకోవాలి. పెద్ద రాష్ట్రాలయితే ఎక్కువమంది ఎంపీలతో ఢిల్లీలో చక్రాలు తిప్పి , ఎక్కువ నిధులు తెచ్చి, చెరో లక్ష కోట్లు పోగేసుకోవచ్చని వారనుకుంటూ ఉండ వచ్చు. చిన్న రాష్ట్రాలలో అది కుదరదు. చిన్నరాష్ట్రాలలో ప్రజలకు జవాబుదారీగా ఉండకుండా, అంతర్జాతీయ సమావేశాలూ, ఫెస్టివల్సూ నిర్వహించుకుంటూ, గోల్ఫ్ కోర్సులకి భూములు ధారాదత్తం చేస్తూ, నిమిషానికొకసారి విదేశాలకు వెళ్లటం కుదరదు.

232 We are all one- you people, do not become fools

232 మేమంతా ఒకటే. జనాల్లారా, మీరు ఫూల్స్ కాకండి.

చర్చనీయాంశాలు: నరేంద్రమోడీ, నవభారత్ టైమ్స్, రాజకీయాలు, Narendra Modi, नरेंद्रमोडी,వ్యంగ్యం

---

भा.भा.प्र.प्र. श्री नरेंद्र मोडी महोदय् భా.భా.ప్ర.ప్ర. శ్రీ నరేంద్ర మోడీ మహోదయ్ నవభారత్ టైమ్స్ అనే హిందీ పత్రికకు 11.5.2014 నాడు ఒక ఇంటర్వ్యూని ప్రసాదించారు. ఇందులో 17 ప్రశ్నలు ఉన్నాయి. ఎన్నికల ప్రచారం ముగిసిన దరిమిలా, ఎన్నికల ప్రచారంలో జన్మించిన కాఠిన్యం, రాబోయే రోజులలో తన విధానాలు ఎలా ఉండబోతున్నాయి, మొ|| అంశాలను కవర్ చేశారు. ఇంటర్వ్యూ కర్త: శ్రీ గుల్షన్ రాయ్ ఖత్రీ. ఈ ఇంటర్వ్యూని చదవాలనుకునే వారికి లింకు: http://m.nbt.in/text/details.php?storyid=34937356§ion=top-news కి వెళ్ళటానికి క్లిక్

వైబీరావు గాడిద వ్యాఖ్యలు:

ఈ ఇంటర్వ్యూ చాల సుదీర్ఘంగా ఉన్నది. ముందుగా నిపుణులైన వ్యక్తులు, కొన్ని రోజులు ముందుగా, లోతుగా ఆలోచించి తయారు చేసినదిగా కనిపిస్తున్నది. స్పాంటేనియస్ (spontaneous सहज) లాగా కనిపించటం లేదు. వారణాసిలో శ్రీ మోడీ గారు నిషేధిత ర్యాలీలో పాల్గొన్న తరువాత, కిరాయి విమానంలో, హెలికాప్టర్లలో వెనక్కి వెళ్ళాక ఉద్రేకాన్ని చల్లార్చుకొని, ఆలోచించుకోటానికీ, కొంత సమయం అవసరం. మోడీ గారి కాంపెయిన్ లో గొప్పతనం ఏమిటంటే, ప్రతిదీ ప్రణాలికా బధ్ధంగా జరిగి పోతుంది. నవగ్రహాలు రావణుడి చేత శాసించబడి, ఇంద్రజిత్ జనన సమయంలో నిర్దేశిత స్థానాలలో నిలబడినట్లుగా, శ్రీమోడీ గారి నిర్వహణలో ప్రతి వ్యక్తీ, ప్రతి సంస్థా, స్థాణువులై, తిరిగి కదలినపుడు నిర్దేశిత కక్ష్యలో, నిర్దేశిత వేగంలో సంచరించి, తిరిగి ఆగమన్నప్పుడు ఆగటం జరుగుతున్నట్లు కనిపిస్తుంది. కాంపెయిన్లకు ఈలక్షణం అవసరమా కాదా అనే విషయాన్ని నేను చెప్పలేను.

పెట్టుబడి విధానంలో ఇంతటి వినయశీలత, సంస్థలకు, వ్యక్తులకు ఎలా వస్తుంది? ఇది ఒక ఆశ్చర్యం. ఇంటర్వ్యూలోని 17 ప్రశ్నలనూ , జవాబులను ఇక్కడ పరిశీలించటం అవసరమైనా, ప్రస్తుతానికి ఈ కార్యక్రమాన్ని మనం పూర్తి చేయలేము. స్థాలీ పులాకన్యాయంగా ఒక పేరాగ్రాఫ్ ను తీసుకుందాము.

मीडिया का यह कहना कि चुनाव के दौरान पैदा हुई कटुता का प्रभाव चुनाव के बाद भी देखने को मिलेगा, एक अतिशयोक्तिपूर्ण सोच है।

తెలుగు సారం: మీడీయాకథనం ఏమిటంటే ఎన్నికల ప్రచారంలో ఏర్పడిన ఈ కటుత్వం యొక్క ప్రభావం, ఎన్నికలతరువాత కూడ చూడటానికి దొరుకుతుంది: ఇది అతిశయోక్తితో నిండి ఆలోచన. दरअसल, जमीनी हकीकत ऐसी नहीं है। अक्सर आपने देखा होगा कि चुनावी समर में एक-दूसरे पर तीखे वार करने वाले नेता जब अनायास किसी हवाई अड्डे पर मिलते हैं, तब उनके बीच बड़े ही सहज ढंग से बातचीत होती है।

తెలుగు సారం: నిజానికి, గ్రౌండ్ రియాలిటీ అలా లేదు. మీరు తరచుగా చూస్తూ ఉంటారు. ఎన్నికల సమరంలో పదునైన కత్తులు దూసుకున్న నేతలు, తరువా త ఏదైనా విమానాశ్రయంలో కలిస్తే , వారి మధ్యలో చాల సహజమైన రీతిలో మాటా మంతీ చోటు చేసుకుంటాయి.

ऐसा नहीं है कि चुनावी जंग की तल्खियां राजनेताओं के आपसी रिश्ते पर हावी हो जाती है।

తెలుగు సారం: ఎన్నికల యుధ్ధంలో కనిపించిన భీకర శతృత్వం రాజకీయ నేతలలో, పరస్పర సంబంధాలలో డామినేట్ చేస్తుందని, ఏమీ లేదు.

गर्मजोशी के साथ मिलने के बाद जब वे फिर रैलियों में पहुंचते हैं तो आरोप-प्रत्यारोप का सिलसिला भी शुरू हो जाता है।

తెలుగు సారం: (విమానాశ్రయాల్లో ఇంత) ప్రేమతో కావిలించుకున్న తరువాత, తిరిగి ఎన్నికల ర్యాలీలకు వెళ్ళినపుడు మరల ఆరోపణల, ప్రత్యారోపణల పరంపర మొదలవుతుంది.

यह समझना होगा कि राजनीति में प्रतिस्पर्धा तो होती है, लेकिन दुश्मनी कतई नहीं।

తెలుగు సారం: ఇది మనం అర్ధం చేసుకోవాలి: రాజనీతిలో ప్రతిస్పర్ధ అయితే ఉంటుంది. కానీ పరమ శతృత్వం ఉండదు.

एक अहम बात और कहना चाहूंगा।

ఇంకొక ముఖ్య విషయం చెప్పాలనుకుంటున్నాను.

इधर, पिछले कुछ समय से सार्वजनिक जीवन में व्यंग्य और विनोद का चलन खत्म-सा होता जा रहा है।

తెలుగు సారం: ఈవైపు, గ త కొంత కాలం నుండి, సార్వజనిక జీవనంలో, వ్యంగం, మరియు వినోదం చోటుచేసుకోటం తగ్గిపోతున్నాయి.

सार्वजनिक जीवन में गंभीरता के साथ-साथ व्यंग्य और विनोद का होना भी जरूरी है, आपसी रिश्तों में उदासीनता के लिए कोई जगह नहीं होनी चाहिए।

తెలుగు సారం: సార్వజనిక జీవనంలో, గంభీరతతో పాటు (along side seriousness), వ్యంగ్యం, వినోదం ఉండవలసిన అవసరం ఉంది. పరస్పర సంబంధాలలో ఉదాసీనత (బహుశా కోపతాపాలు, అలగటం అనే అర్ధంలో కావచ్చు. నిర్లిప్తత అనే అర్ధంలో కాక పోవచ్చు) కు చోటు ఉండకూడదు.

వైబీరావు గాడిద వ్యాఖ్యలు

సార్, కడుపు నిండిన వాళ్ళకి వ్యంగ్యం, వినోదం. మీరు భారత దేశంలో, శేషాంధ్రలో , బహుశా తెలంగాణలో కూడ, గుజరాత్ లో కూడా, ఏ చాయ్ వాలా నడిగినా చెప్తాడు: మా బ్రతుకులకు వ్యంగ్యం, వినోదం కూడానా. పొద్దుటినుండి రాత్రి దాకా చాయ్ గ్లాసులు మోయటం, కస్టమర్లు ఒకడు వేడిలేవంటాడు, ఇంకోడు చక్కెర చాల్లేదంటాడు, ఇంకోడెక్కువయిందంటాడు, ఇంకోడు స్ట్రాంగు అయ్యిందంటాడు, ఇంకోడు నీళ్ళగా ఉన్నాయంటాడు. ఇంకోడు సింగిల్ చాయ్ తాగి వెయ్యి రూపాయల నోటిస్తాడు. మాబ్రతుకులు ఏడవలేక నవ్వటంగా ఉన్నాయంటారు. రాత్రిపూట హోటల్ ఓనర్ చూపించిన కమరాలో పదిమందీలో చాపల మీద పండుకోవాలి. దోమలు కుట్తుండగానే తెల్లారుతుంది, మళ్ళీ చాయ్ గ్లాసులు మొదలు.

ఈమధ్య మంగళగిరిలో చేనేత పని వాళ్ళ దుస్థితి గురించి తెలిసి కళ్ళలో నీళ్ళు తిరిగాయి. రెండురోజులు గుంట మగ్గంలో కూర్చొని నేస్తే ఒక చీర పూర్తవుతుంది. దీనిని రూ. 800 కు అమ్మాలన్నా కొనేవాళ్ళు లేరు. పవర్ లూమ్ ల పోటీ ముందు నిలవలేక పస్తులే మిగులుతున్నాయి.

మా ముఖాలకు హాస్యం కూడానా. వ్యంగ్యం, వినోదం, అనేది రాజకీయ నేతలకి, పారిశ్రామిక వేత్తలకి, బడా వ్యాపారులకి, సినీతారలకీ, క్రికెటర్లకీ, బ్యూరోక్రాట్లకి. ఈరో జు వాళ్ళు ప్రతిస్పర్ధుల్లాగా కాట్లాడుకుంటారు. దుష్మన్ లు లాగా తన్నుకుంటూ ఉంటే, మనం అభిమానులం, అవి అన్నీ నిజం అనుకొని, మనం కూడ తన్నుకొని ఒకళ్ళ నొకళ్ళు చంపుకుంటూ ఉంటాం. వాళ్ళు ఒకళ్ళు నొకళ్ళు చంపుకోరు.

అందు చేత అయ్యా ప్రజలూ, భవిష్యత్ లో ఏదో హవాయి అడ్డాలో శ్రీ ప్రియాంకా వద్రా గారు, శ్రీ నరేంద్ర మోడీ గారు ఎదురుపడి, కరచాలనాలు చేసుకొని, సరససంభాషణలు చేసుకున్నా , మర్నాడే ప్రెస్ కాన్ఫరెన్సులు పెట్టుకుని కొట్టుకున్నా, నిజం అనుకోకండి. జడుల్లాగా ఉండటం అలవర్చుకోండి.

మమతా బెనర్జీ x శ్రీనరేంద్ర మోడీ
“They (Congress) has no guts. It’s shivering with fear. For its survival, the party is indulging in match-fixing, not uttering a word against Modi. It seems to be in love with Modi.”

తెలుగుసారం: కాంగ్రెస్ కి గట్స్ లేవు. అది భయంతో వణికి పోతున్నది. మోడీని ఒక్కమాట కూడ అనకుండా, తన మనుగడ కోసం కాంగ్రెస్ మ్యాచ్ ఫిక్సింగ్ చేసుకుంటున్నది. “... Had I been in Delhi in place of the Congress, I’d have sent Modi to jail by tying a rope around his waist.”

తెలుగుసారం: కాంగ్రెస్ స్థానంలో నేను ఢిల్లీలో ఉండి ఉంటే, మోడీని, ఆయన నడుముకి తాడు కట్టి జైలుకి పంపి ఉండే దాన్ని.

వైబీరావు గాడిద వ్యాఖ్యలు:

భవిష్యత్ లో కు|| మమతా బెనర్జీ శ్రీ|| మోడీ పరాచకాలాడుకుంటుంటే కంగారు పడకండి. పైగా ఇద్దరి నడుముకీ తాళ్ళు కట్టి జైలుకి పంపే వాడు పుట్టుకొచ్చినా ఆశ్చర్యపోనక్కరలేదు.